Kiew kynsan ka NPP ha Jowai ba wan kyrshan u Nongkyrshan ba radbah ka VPP ïa u Dr Nonglait

Shillong, Jymmang 26 : Ka National People’s Party (NPP) ka la ïoh ïa ka jingkyrshan kaba khlem poi pyrkhat ha Jowai ha ka miet Lah Sngi U Blei da ka jingwan kyrshan u radbah ka Voice of the People Party (VPP) u Ma Snarbor Laloo ïa u kyrtong ka NPP Dr DRL Nonglait na ka bynta ka elekshon shiteng samoi ka Shillong Lok Sabha.
U Ma Laloo ula wan ïashim bynta ha ka jingïalang ïalap elekshon jong ka NPP ba long ha Chilliangraij Dorbar Hall ban pynpaw ïa ka jingkyrshan ïa u Dr Nonglait bad ki nongïalam ka NPP kila la pdiang burom ïa u.
Kane ka jingwan kyrshan kala pynkyndit bha ïa u MLA ka Jowai u Ma Wailadmiki Shylla jong ka NPP.
Haba kren ha ka jingïalang, u Ma Wailad ula ong “Ngam shym la khmih lynti ïa kane, hynrei ngi la nang khlaiñ nang khlaiñ katba kane ka jingïalap elekshon ka dang ïaid. Nga ai khublei ïa u Dr Nonglait namar ka jingmynjur ban ïakhun kum u kyrtong ka NPP”.
“Kumta nga ong mynta, phi la pyni ïa ka jingkhlaiñ jong phi. Ngi khlem khmih lynti ba u Ma Snarbor un wan bad kyrshan ïa phi kum u kyrtong ka NPP. Kane ka long kaei kaei kaba kyrpang” ula bynrap.
U Ma Wailad ula ong ba kane ka jingjia ka long ka “dak kaba bha” ïa ka NPP hashuwa jong ka elekshon shiteng samoi.
“Ki paidbah na kylleng ka ri-lum Khasi bad Jaintia ki la wan shakhmat ban kyrshan ïa ka NPP bad ïa u kyrtong jong ngi namar u ïoh ïa ka jingieit bad jingshaniah jong u paidbah” ula ong.
Ula ai nam ïa ki jingpyrshang jong u Dr Nonglait ha baroh ki snem bala leit ban ïoh jingithuh ïa ka ktien Khasi kum ka Official Language ka Jylla.
“Ngi dei ban ai khublei ïa u. Kum u President ka KAS, bad khlem da bat ïa kano kano ka kam ha ka saiñ pyrthei, ula pynthikna ba ka ktien Khasi ka ïoh jingithuh kum ka Official Language. Kum u MP, yn sa lah ban tynruh ha ka ban pynrung pat ïa ka hapoh ka khyrnit ba phra jong ka Riti Synshar ka Ri”.
Haba pdiang ïa ka jingwan kyrshan u Ma Snarbor, u Dr Nonglait ula ong “Ngam pat ju ïakynduh ïa u lane ïakren bad u lyngba ka phone. Nga la shu ïohi ïa u Madiah ha YouTube. Mynta ka sngi nga ïoh ban ïakynduh markhmat ïa u”.
U Dr Nonglait ula bynrap ba ka jingwan kyrshan u Ma Snarbor ka long kaba ai mynsiem bha. “ka ai mynsiem ïa nga ban ïohi ïa ka sur rangbah, uba kren na ka bynta ka bha ka miat bad ka roi ka par jong ka thaiñ, ban ïeng ryngkat bad ngi” ula ong.Ka jingïalang kala dap snam da ki nongkyrshan kiba la ïatuid sha kane ka hall.