Nongpoh. Lber 22: Ki paidbah jong ka shnong Maikhuli kaba hap haka Raid Marwet, Ri-Bhoi District mynta ka sngi kila pynlong da ka jingïalang paidbah ban pynpaw ka jingpyrshah jur halor ka jingshah kynthup noh ki katto katne ki jaka bad ki shnong jong ka jylla Meghalaya sha Assam hadien ka jingpynbeit pud hapdeng ka Meghalaya bad Assam.“Ha katei ka jingïalang paidbah la wan ruh ban kyrshan lang da ki katto kaatne tylli ki kynhun sengbhalang naduh ka CoRP, MUSO bad MPSO ha kaba ki paidbah ha katei ka sngi kila pynlong ruh da ka jingïaid paidbah shaduh ba kut jong kawei ka pung kaba don ha katei ka shnong kaba la thmu ban aiti noh sha Assam kum ka dak ka jingpyrshah jur ba ki paidbah kim kwah bad kim ailad ba katei ka pung kan leit noh sha Assam namar ka dei kaba la shnong ha katei ka shnong da ka jingïarap pisa jong ka sorkar Meghalaya.“Naka liang ki bor pyniaid district jong ka Ri-Bhoi ruh mynta ka sngi kila hiar sha katei ka jaka ban tem ïaki paidbah ioh mih kano kano ka huri hura kaba lah pat ban ktah ïaka shongsuk shongsaiñ jong ki paidbah, ha kaba naka liang ki paidbah kila pynlong ka jingïakhih bad jingpyrshah da kaba jai jai.“Haba kren ha katei ka sngi naka liang ki katto katne ngut ki riew rangbah jong ka shnong Maikhuli kila pynpaw ka jingpyrshah kaba jur halor ka jingshah kynthup noh bun tylli ki shnong ha Assam bad khamtam katei ka pung jong ka shnong kaba katkum ka jingïathuh jong ki la ong ba katei ka pung ka dei kaba hap hapoh u pud u sam jong ka jylla Meghalaya bad kam don kano kano ka jingkam trai lane ka jingkynad ïa katei ka pung da ka Assam namar ka dei ruh kaba la ïarap pisa lyngba ka sorkar Meghalaya ban pynbit pynbiang ïaka.“Kila pynpaw ruh ba mynno mynno katei ka pung kam ju don haka jingkynad bad kam ju don ka jingwan kam trai daka Assam ïa katei ka pung namar ka dei kaba la tei da ka sorkar Meghalaya, hynrei kaba sngewsih ka long ba dei hadien ka jingpynbeit pud ka Meghalaya bad Assam la ioh jingtip pynban ba ïa katei ka pung la pynhap noh sha Assam.“Naka liang ki paidbah bad ki nongïalam shnong kila pynpaw ruh ba kim hun ïa katei ka jingpynbeit pud ka Meghalaya bad Assam bad ka jingmih ka jingbym hun bad ka huri hura haki paidbah ka dei ka jingbakla jong ka sorkar Meghalaya kaba la shu leh thurmur khlem ka jingkynjoh ktien lang naki nongïalam shnong nongïalam Hima kiba tip shai halor u pud u sam.“Shuh shuh naka liang ki paidbah ha katei ka sngi da kawei ka sur kila shim ruh ba kin nym ailad satia ba katei ka jaka khamtam katei ka pung ba kan leit sha Assam wat la ka long ha kano kano ka rukom namar ka dei ka pung ba donkam jong ka shnong bad ruh kaba la tip shai ba kadei ka jaka jong ka shnong Maikhuli ha Ri-Bhoi District.“Kila kyntu ruh sha ka Sorkar ba kadei ka leit jurip ryngkat ki nongïalam shnong ba katei ka pung kam dei ban leit sha Assam da lei lei ruh bad lada ka sorkar ka shu sngap mynthi naka liang ki paidbah kin sa shim pat da kiwei ki lad ki lynti.
