Kwah ka HSPDP ban ïatrei lang ki Seng Riewlum ha ka Election MLA 2023

Shillong, Lber 22 : Ka HSPDP kawei na ki party kaba donlang ha ka sorkar synrop jong ka sorkar MDA ka la pynpaw ba ki thrang ban don biang ka jingïatrei lang hapdeng ki party riewlum ha shwa ka elekshon MLA ha u 2023 kumba ki la ïateh soskular bad ka UDP ha shwa ka elekshon MLA 2018.“Kumban shu kdew hangne, ka UDP bad HSPDP ki la thaw da ka Regional Democratic Alliance (RDA) ha u 2018 ban tehsong ïa ki MLA jong ka ha ka sorkar synrop jong ka Meghalaya Democratic Alliance ba lamkhmat da ka NPP.“Haba kren bad ki lad pathai khubor hadien ba la wai ka jingïalang jong ka Central Executive Committee, na ka liang u President ka party, Bah KP Pangniang, u la ong ba haduh mynta kim pat lah satia ban kren halor ka soskular shwa ka elekshon lane katno ngut kin pynieng kyrtong namar kim pat ïoh ban ïakren lang bad ka RDA halor katei ka bynta.““Ki don kumba 12 ne 13 tylli ki jaka ba ngi la pynkhreh bha namar ngi poi haduh ka final ha ka elekshon ba la dep la ka long ha ka MLA ne MDC. Hynrei ban ong katno ngut ngin pynieng kyrtong ngim pat lah ban ïathuh lut. Mynta ngi dang ap ïa ka RDA kaei ba kan ong ma ka, lehse ngin ïatrei lang biang lane don ka jingsngewthuh jingmut hangne hangtai lane ngin pynkut noh,” ong u President hadien ba la wai ka jingïalang.“La ïathuh ruh ba watla kiwei ki ong ba kadei ka party kaba kham rit bad kham duk hynrei ha kane ka kynti ba mynta ki kwah ban ïohi ïa ka dur kaba phylla khyndiat ha ki paidbah khamtam haba ïadei bad ka thong treikam kumba la mait phang da u Maieit HS Lyngdoh ha kine ki 53 snem ka jingïaid lynti.““Ban leit sha u paidbah ban ong ba ngi donkam shibun ka pisa, kam ïahap namar kam dei satia ka thong treikam jongngi. Hynrei ngin ong wan sha ka party jongngi ba ngin thep ïa ka mynsiem ieid ri halor ka nongrim kiba ngi lah shisha ban wanrah ïa ka jingïada ïa ka Jaidbynriew jongngi kaba kyrpang, ban tei bad kyntiew ïa ka Jaidbynriew. Ngi kloi ruh ban ïatai bad ki National Party ba hato ki thong treikam jong ki, ki long neem ba ka Jaidbynriew jongngi kan pdiang ne ban pynmyntoi ïa ka,” u la bynrap shuh shuh da kaba kdew ba dei ka HSPDP kaba rah ïa ka ishu khappud la palat 50 snem.“Haba bynrap lang, u Chief Organiser jong ka party, Bah Samlin Malngiang ba dei ruh u MLA ka Sohiong u la ong ba namar ha u snem 2018 ka don ka jingïatrei lang hapdeng ka UDP bad HSPDP hapoh ka lama jong ka RDA, kumta na ka liang ka party kim pat shim kano kano ka rai ba kin pynkut lane ban pynskhem biang.““Ïa kane ngin sa kynduh lang namar na ka party hi ngi kyrmen skhem ba donkam ban pynkhlaiñ ïa ka bor jong ki party riewlum. Ia kane ngin sa rah pat ha ka jingïakynduh lang jong kine ki ar party, kata ka UDP bad HSPDP,” u la ong.“Utei u MLA u ong ruh na ka bynta ban pynkhreh na ka bynta ka elekshon MLA kaban long ha u 2023, ki la ïatai ba donkam ban leit sha u paidbah ha ki shnong ki thaw khnang ban dup lah ban pynjop kham bun ki kyrtong ha ka elekshon ban wan.