Kiew kiba pass SSLC sha ka 97.26% hadien ba pass sa 5,073 ïa ka eksamin Supplementary

By Mawphor Editor On May 23, 2026

Shillong, Jymmang 22 : Ka jingpass jong ki khynnah skul ïa ka eksamin Secondary School Leaving Certificate (SSLC) 2026 ka la kiew mynta sha ka 97.26% hadien ba 5,063 ngut ki khynnah kila pass ïa ka eksamin supplementary mynta ka sngi.
Ka Meghalaya Board of School Education (MBoSE) ha ka sngi Thohdieng, kala pynbna ïa ka result jong ka eksam SSLC supplementary 2026, kaba ka jingpass ki khynnah ka long 90.16%.
Na ki 5,631 ngut ki khynnah kiba ïakhun ïa ka eksamin, 5,063 ngut ki la pass. ïa kane ka eksamin supplementary la pynlong ha ki 74 tylli ki centre hapoh ka Jylla.
Kat kum ki District, ka West Khasi Hills ka dei kaba bun eh kiba pass kaba kot 99.34%, bud ka Eastern West Khas Hills ba kot 99.15% bad ka South West Khasi Hills ba kot 97.43%.
Haba thoh ha X, u Myntri Rangbah u Conrad K Sangma ula ai “ka jingkhublei naduh ka dohnud” sha ki khynnah pule, haba pynpaw ba ka result jong ka eksamin supplementary ka pyni ïa ka jingïai minot ha ka pule puthi.
“Ka eksam SSLC Supplementary ka pyni sa shisien ba ka jingkut jingmut, ka jingtrei shitom bad ka jingminot ka lah ban jop ïa ki jingeh” ong u Myntri Rangbah.
“Na ki 5,615 ngut ki khynnah kiba la ïakhun ïa ka eksamin, 5,063 ngut ki la pass, kaba pyni ïa ka jingjop kaba bha tam kaba long 90.17%. Da kane ka jingjop, ka jingpass baroh lang ïa ka eksam SSLC 2026 ha Meghalaya ka la kiew mynta sha ka 97.26%, ha kaba haduh 47,291 ngut kila pass ïa ka eksamin, napdeng ki 48,623 ngut ki khynnah kiba ïaleh ïa ka eksamin mynta u snem” ula pynbna.
Haba khot ïa ka “ka khyllipmat kaba sngew sarong ïa ki khynnah pule jong ngi, ki Kmie Kpa, ki Nonghikai bad baroh kiba don bynta ha ka pule puthi ka Meghalaya” u Conrad ula kyntu ïa ki khynnah pule kiba pass ba kin don ïa ka thong ba kham shajrong.
“Sha baroh ki khynnah pule kiba la jop, nga kitbok kitrwiang ïa phi na ka bynta ki kam kiba phin leh hadien habud. ïai bteng ban don ïa ka thong kaba heh, trei shitom bad pynlong ïa ka Meghalaya kaba sngew sarong” ula ong.