“Em ïa ka jingpynjot mariang” bad “Hooid ïa ka jingïada ïa ka mariang” pyrta ki paidbah ka Shnong Mawrapad

Mawrapad, Jymmang 22: Ka Dorbar Shnong Mawrapad lyngba ka Biodiversity Management Committee (BMC) ka la pynlong ïa ka jingrakhe ïa ka “International Day for Biological Diversity” ha ka 21 tarik u Jymmang, 2026, da kaba pynlong bun jait ki prokram kiba ïadei bad ka jingïada bad ka jingpynneh pynsah ïa ka mei mariang kaba itynnad.
Ha kane ka sngi, la pynlong ïa ka jingpynkhuid shnong da ka jingïashim bynta lang jong baroh ki nongshong shnong shynrang bad kynthei, ki riew rangbah, ki longkmie, ryngkat ka jingïarap jong ki samla shnong, ka VDP, ka Sport Club bad ki dkhot jong ki Self Helps Group.
Nalor kata, la pynlong ruh ïa ka jingthung dieng ha ki bynta bapher bapher jong ka shnong bad ruh ka jingïakop dro dur katkum ka phang “Pynneh Pynsah Ïa ka Mei Mariang”, ha kaba ki khynnah rit ki la ïashim bynta shitrhem bad la sam ruh ïa ki khusnam sha ki nongjop.
Hadien kine ki prokram, la pynlong ïa ka Awareness Programme halor ka bynta kaba donkam ban pynneh pynsah ïa ka mei mariang bad ban kiar na kino kino ki kam kiba lah ban pynjot ïa ki sawdong sawkun kaba ngi shong ngi sah.
Ïa kane ka prokram la wan ban pynshngaiñ da ka jingdonlang u Officer Incharge jong ka Mawsynram Police Station, u E. Marak, uba la kyntu ïa ki paidbah shnong ban long kiba phikir bad jingïatreilang ban ïada ïa ka mariang, ki khlaw, ki btap bad ki jingïoh jingmyntoi kiba ka mariang ka ai ha ka jingim manla ka sngi. U la ban jur ruh halor ka jingïatylli ki shnong ki thaw kum ka lynti ban wanrah ïa ka jingryntih bad ka jingkiew shaphrang.
La ïoh ruh ïa ki jingkren na u bah Lumbor Surom, uwei na ki dkhot ka BMC Mawsawa bad ka 5 Shnong BMC, nangta na u President ka VDP Bah Kenesjones Nonglait bad na u Secretary jong ka Sport Club shnong, kiba la ai mynsiem ïa ka BMC ban nang trei shitom ha ka kam jingïada ïa ka mei mariang. Ki la pynpaw ba ka jingpynneh pynsah ïa ka mariang ka long ka jingkyrkhu kaba khraw namar kiba bun ki jingthung, ki mrad bad ki jingïoh jingïarap kiba dang don ha kane ka thaiñ, katba ha kiwei pat ki jaka ki la nang duh noh.
Ïa ka Awareness Programme la pynïaid da u Rangbah Shnong bad Chairman jong ka Mawrapad BMC, uba la pdiang sngewbha bad ai khublei ïa baroh kiba la wan jingïashim bynta. U la pynpaw ruh ba lyngba ka jingïohi jngai jong ki longshuwa bad ka jingsumar ïa ki khlaw shnong, mynta ki paidbah shnong ki dang ïoh ïa ka um kaba khuid bad pahuh na ki tyllong um kiba mih na ka khlaw shnong.
Shuwa ban pynkut ïa ka prokram, u la ïalam ïa baroh kiba la wan jingïalang ban pyrta lang “Em ïa ka jingpynjot mariang” bad “Hooid ïa ka jingïada ïa ka mariang” kum ka dak jong ka jingïasnohkti paidbah ban sumar ïa ka mei mariang.
Ha kaba kut, u Rangbah Shnong, u Bah Kyrmen Shangdiar u la ai ka jingkhublei bad jingkyrkhu kyrdoh ïa baroh ki nongshong shnong kiba la kloi ban ïa snohkti lang ban pynlong ïa kane ka prokram kaba jop bad kaba seisoh.