IDY 2026: Ka Jingïalam ïa ka Pyrthei sha ka Jing pyndonkam Mar kaba don Jingbah khlieh -Prataprao Jadhav

Katba ka pyrthei ka dang rakhe ïa ka International Day of Yoga (IDY) 2026, ka jinglong briew ka don ha ka por kaba kongsan bha na ka bynta ka imlang sahlang. Ngi im ha ka juk jong ka jingkiew kaba phylla ha ka liang ka teknoloji bad ki tiar ki tar, hynrei ngi ïakynduh ha kajuh ka por ïa ki jingeh namar ka jingkiew ka rukom im, ka jingeh ha ka bor pyrkhat kaba nang kiew, ka jingpynjot ïa ka mariang, bad ki rukom im ki bym lah ban pynneh pynsah. Ha ka pdeng jong kiba bun na kine ki jingeh ki dei namar kawei ka daw – ka jingpyndonkam khlem da tehlakam bad khlem jingpyrkhat.
Naduh ka jingpyndonkam palat ïa ki marpoh khyndew haduh ka jingshaniah palat ha ki kam pynbyrn ïadigital bad ki rukom im bym lah ban pynneh pynsah, ki imlang sahlang jong kane ka juk ki nang jngai shuh shuhna ka jinglong kaba ryntih. Dei ha kane ka jinglong ba ka Yoga ka mih ym tang kum ka rukom pynkoit jingkhiah kaba hyndai, hynrei kum ka rukom treikam kaba khlem kut por na ka bynta ka jingim kaba don jingkitkhlieh. Ka Yoga ka ai ha ki briew ïa ka lad kaba khlaiñ sha ka jingpynïaid ïa ka jingim lajong, ka jinglong ryntih, bad ki jingshim rai kiba don ka jingsngewthuh. Ka hikai ïa ngi kumno ban pynphai biang ïa ka jingryntih – hapoh jong ngi bad bad ka pyrthei sawdong jong ngi.
Ka Jingkyntu na ka bynta ka rukom pyndonkam mar kaba don jingpyrkhat
Ha kaba pynbeit ïa ka jingeh ha ka pyrthei jong ka jingpyndonkam palat, ka jingïalam ba shemphang jong u Myntri Rangbahduh jong ngi u Narendra Modi ka la ai ka lad lyngba ka Mission LiFE – Lifestyle for Environment. Ha ka COP26, u Myntri Rangbahduh u la pynpaw ïa ka nongrim kaba ïahap bha bad ka jingmut jingpyrkhat jong ka Yoga: “Kaei kaba ngi donkam mynta ka long ka jingpyndonkam kaba don jingmut bad kaba thmu, ha ka jaka jong ka jingpyndonkam khlem jingpyrkhat bad kaba pynjot.”
Dang shen, hapdeng ki jingbym thikna ha ka ïoh ka kot ha ka pyrthei bad ki jingthut ha ka jingpynbiang mar, u Myntri Rangbahduh u la ai ïa kane ka jingkyrpad sha ka jingkitkhlieh jong ki paidbah man la ka sngi. U la pynshlur ïa ki nongshong shnong ban pyrkhat bha ïa ka jingpyndonkam kaba lah ban kiar – naduh ka jingpynneh pynsah ïa ka umphniang bad pynduna ïa ka jingpyndonkam ïa ka bor ding kaba khlem donkam haduh ban pyrkhat biang ïa ki jingpynlut bym donkam. Kane ka jingkyrpad kam dei kaba la wanna ka jingduna; hynrei, ka dei ka jingkyntu kaba don nongrim ha ka jingsngewlem bad ka jingskhem, ka jingïaineh bad ka jingbah khlieh na ka bynta ka ri. Kumba u la pynkynmaw ïa ngi, “Kawei pa kawei ka sienjam kaba rit bad kaba heh ka long kaba kongsan, kumba kawei pa kawei ka symboh um ka pyndap ïa u khra.”
Kine ki rukom pyrkhat ki ïadei bha bad ki nongrim ba kongsan jong ka Yoga. Ka jingstad Yogic ka kren shaphang ka Aparigraha – ka jingpynsangeh ïa ka jinglum bym donkam – bad ka Santo sha – ka jingsngewhun ïa kaei kaba u briew u donkam shisha. Kine ar tylli ki rukom pyrkhat ki wanrah ïa ka jingmut jingpyrkhat kaba pynjngai ïa ki briew na ka jingpyndonkam bym donkam bad sha ka jingim kaba don jingsngewthuh. Ka Yoga ka pynkylla ïa ngi na ki nongpyndonkam ki bym pyrkhat jngai sha ki nongsumar ïa ka pyrthei kiba don ka jingbah khlieh.
Ka Yoga kum ka atiar na ka bynta ka jingryntih bad ka mariang
Ka pyrthei ka don ïa ki jingdon jingem ban pyndap ïa ki jingdonkam jong ki briew, hynrei kam pat biang ban pynhun ïa ka jingkwah rhah kaba khlem pud. Ka Yoga ka ïarap ban pynphai biang ïa kane ka jingsngewthuh da kaba pynjylliew ïa ka jingsngew jong ngi ïa ka jingïadei bad ka mariang. Ka lyer kaba ngi ring mynsiem, ka jingbam kaba ngi bam, bad ka jinglong ryntih kaba ngi thrang baroh ki long shi bynta jong kawei ka jinglong jingman.
Ka jingleh ïa ka Yoga suki suki ka pynkylla dur ïa ka jinglong napoh. Ka ai jingtngen na ka jingbymsuk ka jingmut jingpyrkhat, ka pynduna ïa ka jingshim rai kulmar bad ka pynkhlaiñ ïa ka jingpynïaid ïalade. Ha ka pyrthei kaba bun ka jingpynhun kaba kloi bad ka jingpyndonkam palat, ka Yoga ka wanrah ïa ka jingshai ha ka mynsiem kaba donkam ban ithuh ïa ki jingthrang kiba shisha bad kito kiba shuk wah rhah.
Kum u Myntri uba ïadei bad baroh ar ki tnad ka Koit ka Khiah bad ka Ayush, ngasakhi man la ka sngi kumno ka Yoga ka long kum ka atiar ban ïada ïa ka koit ka khiah paidbah pyrshah ïa ki jingpang bym lah ban saphriang. Da kaba pynshlur ïa ka jingkilan met, ka jinglong ryntih ha ka jingmut jingpyrkhat, bad ka jingim kaba don ka jingpynbeit, ka Yoga ka pynduna ïa ka jingshaniah ha ki rumom im ki bym bha bad ki jingsumar kiba palat. Ka rukom im yoga ka pynshlur ïa ka jinglong kaba suk, ka jinglong kaba jem, ka jingbam kaba ïahap, ka jingpynduna ïa ka jingpynlutkai, bad ka jingpyndonkam ïa ki jingdon jingem da ka jingpyrkhat -ki jingkylla ha ka jinglong kiba donkam na ka bynta ka jingpynneh pynsah ïa ka mariang.
Kumta, ka Yoga kam dei tang ka lad sha ka koit ka khiah; ka dei ruh ka rukom treikam na ka bynta ka jingbahkhlieh na ka bynta ka mariang.
Ka jinglong nongïalam ka India ha ka koit ka khiah jong ka pyrthei
Mynta, ka Yoga ka la nang kylla sha kawei na ki jingnoh synniang ba kongsan tam jong ka India sha ka pyrthei – ka jingpynpaw kaba khlaiñ ïa ka koit ka khiah, ka jingïatylli, bad ka bha ka miat jong baroh. Kaei kaba la sdang kum ka rukom jong ka imlang sahlang hyndai mynta ka la kylla long ka jingïakhih ha ka pyrthei ka bym sahkut tang hapoh ki jaka, ki kam saiñ pyrthei, ki ktien bad ki kolshor.
Man la u snem, da ki million ngut ki briew ha kylleng ki dewbah ki ïashim bynta ha ki jingrakhe Yoga, ym tang da kaba leh ïa ki asana, hynrei da kaba pdiang ïa ka jingangnud ba ïasamlang na ka bynta ka jingim kaba koit ba khiah, kaba ïahap bad kaba lah ban ïaineh. Ka Yoga ka la mih kum ka ktien jong ka pyrthei kaba don nongrim ha ka jingïada na ki jingpang, ka koit ka khiah ha ka bor pyrkhat, bad ka jingim kaba don jingpyrkhat.
Lyngba ka Yoga, ka India ka la ai ïa ka pyrthei ïa ka rukom treikam kaba khlem pynbor bad kaba kynthup lang ïa ka koit ka khiah kaba pura – kawei kaba pynbeit ïa ki jingkhuslai jong ka juk mynta da ka jingstad kaba shyrta. Kane ka dei ka jingmut kaba kham jylliew jong ka IDY 2026. Namar ba ka Yoga ka ktah ïa ki million ki jingim ha ka pyrthei, ka ai ruh ïa ka rynsan kaba khlem da lah ban ïanujor ban pynshlur ïa ka jingkylla ha ka jinglong ha ka rukom kaba ïar bha. Ki khubor jong ka jingpynneh pynsah, ka jinglong ryntih, bad ka jingim kaba sngewthuh ki lah ban pur kham sha jngai bad ban sawa kham jam lyngba ka mynsiem ba ïatylli jong ka Yoga.
Kawei ka jingkut jingmut na ka bynta ka IDY 2026
Ka bha ka miat kaba shisha kam lah ban don ha ka jinglong marwei. Ka koit ka khiah jong u briew, ka bha ka miat jong ka imlang sahlang, bad ka koit ka khiah jong ka pyrthei ki dei kiba ïadei iwei ïa iwei. Ki jingeh jong ka jingkylla ka suiñbneng, ki jingpang namar ka rukom im, bad ka jingpynjot ïa ka mariang ki donkam ym tang ïa ki sienjam katkum ki polisi, hynrei ki donkam ruh ïa ka jingkylla ha ka jinglong.
Ha kane ka International Day of Yoga, to ai ba ka jingaiti jong ngi kan ym sahkut ha tang ka yoga. To ngin pdiang ïa ka Yoga ym tang kum ka jingleh kaba man ka sngi, hynrei kum ka rukom im – kaba kyntiew ïa ka jingpyndonkam mar kaba don jingmut, ka jingpynbeit kaba hapoh, bad ka jingkitkhlieh na ka bynta ka mariang.
To ngin ai ka jubab ïa ka jingkyntu jong u Myntri Rangbahduh ba ngin don ka jingim kaba don ka jingsngewthuh bad ban tei ïa ka lawei ha kaba ïa ka roi ka par ngi thew ym tang na kaei ba ngi pyndonkam, hynrei na ka rukom im kaba don ka jingbahkhlieh. Da kaba pynkylla ïa ka jinglong tynrai jong ngi, ngi lah ban ïatreilang ban sumar ïa ka jinglong jingman jong ka pyrthei.

(U nongthoh u dei u Myntri Khynnah (IC) ka Sorkar Pdeng uba dei khmih ïa ka tnat Ayush bad ka tnat ka Koit ka Khiah.)