Lada phi pyrshah pynpaw ha ka Public Hearing, kyntu u DyCM ïa ki kynhun ba pyrshah kompeni Shree Cement

Shillong, Jymmang 21 : U Symbud Myntri Rangbah ka Jylla, Bah Prestone Tynsong ha ka sngi Palei u la ong ba kito kiba pyrshah ïa ka kompeni Shree Cement ki dei ban leit pynpaw ha ka public hearing ym ban pynlong da ki jingïakhih pyrshah.
Haba kren bad ki lad pathai khubor u Symbud Myntri Rangbahu la ong ba donkam ban sngewthuh ba ka public hearing ka dei ka rynsan paidbah ha kaba naduh kiba pyrshah haduh kiba kyrshan ki ïoh ban pynlong ïa ka sur jong ki.
“Ka jingmut jong ka Public Hearing ba ka State Pollution Control Board ka pynlong ka long ban ïohsngew ïa kaei ka jingsngew jong ki paidbah la kata ka jingtrywa ban pynieng ïa ka karkhana dewbilat ka biang ne kam biang. Dei na kane ka daw ba la pynlong ïa ka Public Hearing,” ong u Bah Prestone.
Shuh shuh u ong ruh haba ki paidbah ki don ka jingsngewkhia ki dei ban leit pynpaw ha ka public hearing. “Sngewbha wat sngewthuh bakla bad ong ba ngi leh bor na ka sorkar jylla. Lada ngi lehbor kamut ym don public hearing,” u la bynrap shuh shuh.
Kane ka jingkren jong u Bah Prestone ka dei hadien ba ka la mih ka jingiakhih pyrshah ha kine ki khyndiat sngi na ki kynhun kiba pyrshah ïa katei ka kompeni Shree Cement.
Ha kajuh ka por na ka liang u Deputy Commissioner ka East Jaintia Hills bad ruh na ka State Pollution Control Board ki la iathuh ba ki bud ia ka hukum jong ka High Court bad kumta ki kyntu baroh ki arliang paidbah ba kin wan ban shim bynta ha ka public hearing kumba la pynbeit.
Haba kren bad ki lad pathai khubor, ki la kyntu ia ki paidbah ba ki lah ban wan shim bynta ha katei ka public hearing markhmat lane ki lah ruh ban phah da ka jingthoh. “Ngin leh katkum ki kyndon ba la buh ban pyntikna ba ka public hearing kan long kaba khuid bad kaba shai khnang ban ioh ia ka jingbishar kaba hok,” ki la ong.