Kynnoh ka NESO ba ai ding pynban ka sorkar pdeng halor ki jingjia ïakynad ki Kuki bad Naga ha Manipur

Shillong, Jymmang 21: Ka North East Students’ Organisation (NESO) ha ka sngi Palei ka la pynpaw ïa ka jingsngewkhia kaba jur halor ka jingïai bteng ka jingïakynad hapdeng ki Kuki bad ki Naga ha Manipur, haba pynrem ïa ki jingthombor ïa ki riew paidbah bad buh jingkylli ïa kaei kaba ka khot ka “jingbym leh eiei bad kynnoh ai ding pynban’ jong ka Sorkar Pdeng ha kane ka jingïakynad ba kan neh slem.
HA KA KYRWOH KHUBOR LA ONG BA kane ka rai la shim ha ka jingïalang kaba la pynlong ha Guwahati bad kaba la pynlong da ka All Assam Students’ Union (AASU).
Shuh shuh halor kane ka NESO ka ong ba ki jingïai jia ki jinghiar thma kynsan (ambush), ki jingpynïap, ki jingrahbor bad ki jingpyntieng pynsmiej ïa ki nongshong shnong ba lui lui ka la wanrah ïa ka jinglong jingman kaba sheptieng, ka jingsngew shngaiñ bad ka jingbym shongsuk ha ka thaiñ baroh kawei.
Ha ka kyrwoh, u Chairman ka NESO Bah Samuel B Jyrwa ula pynrem jur ïa ka jingïai jia ki kam pynïap bad jingthombor ïa ki nongshong shnong ba lui lui, kynthup ki nongïalam niam haba bynrap ba ki jingthombor pyrshah ïa ki nongshong shnong ba lui lui bad ba khlem tiar, kiba don ha ka kam ban wanrah jingsuk ka dei kaei kaei ka bym lah ban pynksan.
Ka NESO ka la kyntu jur ruh na ka bynta ka jingpynlait noh khlem kyndon ïa baroh ki briew ba shah rahbor kiba la set jubor haba kyrpad ba ym dei ban pynmong pynmynsaw ïa ki.
Haba phai sha ka bynta jong ka Sorkar Pdeng, u Bah Samuel ula ong ba ka NESO ka pynpaw ïa ka jingpynrem kaba jur eh bad buh kylli ïa ka bynta jong ka Sorbar India halor ka jingbym leh eiei bad kynnoh aiding pynban ha kane ka jingïakynad ba la neh slem, kaba la ïai bteng ban shim ïa ka jingim jong ki lui lui bad pynthut ïa ka thaiñ.
Ka kyrwoh ka pynpaw ba bun ki briew la pyntip ba kila jah bad ym shym lapdien shuh naduh ba jia ki jingthombor bad dawa ïa ka Sorkar ba kan shim ïa baroh ki sienjam kiba thikna ban lah lapdien shano ba ki don.
Ka jingïalang ka la wai da ka jingkyrpad ïa baroh ki Jaidbynriew bad ki kynhun ba don bynta ba kin kyntait ïa ki kam thombor bad pynphai mar kylliang, hynrei ban ïatreilang noh na ka bynta ban wanrah ïa ka jingsuk, ka jingbishar hok bad ka jingwanrah biang ïa ka jinglong jingman kaba jai jai ha Manipur.
Kiba la ïashimbynta ha kane ka jingïalang ki kynthup ïa ki nongmihkhmat na ka All Manipur Students’ Union (AMSU), AASU, All Arunachal Pradesh Students’ Union (AAPSU), Khasi Students’ Union (KSU), Mizo Zirlai Pawl (MZP), Garo Students’ Union (GSU) bad ka Naga Students’ Federation (NSF), nalor kiwei pat ki paidbah jong kane ka thaiñ shatei lammihngi.