Mih ki briew ba thmu kam ei ïa ki kam pynroi ba leh da ka sorkar ba ïalam da ka NPP : Conrad

Damas, Jymmang 18 : U Myntri Rangbah ka Jylla Conrad K Sangma ha ka sngi Nyngkong u la ong ba ka Sorkar Jylla ka la trei borbah na ka bynta ban wanrah ïa ka roi ka pa kaba dei na ka bynta ka jingmyntoi jong ki paidbah nongshong shnong.
Haba kren ha ka jingïalang ha Damas, u Myntri Rangbah u la kdew ïa ki kam thymmai ha social media ba pynphriang ïa ki khubor lamler bad ïalam bakla ïa ki paidbah da kaba pyrshang ban shim burom ïa ki kam pynroi ba la leh da ka Sorkar ba ïalam da ka NPP.
U la ong ba kine ki juh ki briew ba leh politik ki la pynphriang ïa ki jingtip ba bakla ban kynthoh pyrshah ïa ka Sorkar halor ki kam ki bym lah ban pynbeit da ki snem hynrei la lah pat ban pynbeit khatduh da ka Sorkar ba ïalam ka NPP.
“Ngi kum ka Sorkar ngi la buh ïa ka bha ka miat ki paidbah hakhmat eh jong ki kam pynroi bad ngi la trei na ka bynta ka jingmyntoi kaba bha eh na ka bynta ki briew jong ngi. Ngi la buh ïa ka hok jong ki padibah trai ri trai muluk ha ka bynta ba hakhmat duh” u la bynrap.
Haba kren halor ki jingjia bapher bapher kiba la tynjuh ïa ka Sorkar, u la ong ba ka Sorkar ba ïalam da ka NPP ka la bat skhem ïa ka nongrim ba kan nym pyni bor bad kam pat ju pyndonkam bakla ïa ka bor pyrshah ïa u paidbah. “Ngi la bat ïa ka nongrim ban nym pyni bor ha man ki jingjia. Namar jong ngi, ki paidbah ki ïai don hapdeng eh ha ka mat treikam jong ngi na ka bynta ka roi ka par”.
U la ong ba ka Sorkar ka ngeit ha ki jingïakren bad jingïasyllok, bad ym ka jingpyndonkam ïa ka bor ban pynsngap jar ïa ki sur. “Ngi kwah ban wanrah ïa ka lynti ban pynbeit ïa baroh ki jingeh. Ngi ngeit ha ka jingsngap bad jingïakren bad ki briew jong ngi”.
“Ngi ieid ïa ka Jaidbynriew bad ngim kwah ban ïohi ïa ka jingia umsnam, ngi ïa don beit hangtei ban ïalam ïa ka imlang sahlang da ka jingieid bad ka jingsngewlem”.
Ha ka por ba mih ka jingeh ba ïadei bad ka GHADC, u pyntip ba ka Sorkar ka la jubab ïa baroh ki Sengbha lang bad ki paidbah baroh. “Ngi burom ïa ka jingsngew jong ki briew jong ngi bad ngi la jied ban rai ïa kaei kaba ki paidbah ki kwah da kaba pynlong kongsan ïa ka syrnot ST ha ka ban ïakhun ïa ka elekshon GHADC”.
“Ki la don ki jingïakhih halor kane ka kam ha ki snem ba la leit. Kane ka dei ka jingdawa ka la la rim, ym pat ju don ki Sorkar kiba la leit noh, kiban rai ban pynbeit ïa kane ka kam, hynrei ka Sorkar ba ïalam ka NPP bad ka Executive Committee ka GHADC ba ïalam ka NPP ka la rai ban pynkylla ïa ka ain ban weng noh ïa ki bar jylla na ka jingïakhun ïa ka elekshon ka Autonomous Council.
“Ha man ki kam ba ka Sorkar ka leh, ki paidbah ki dei kiba don hakhmat eh” u la pynsngew. U la pyntip ba lah dep ban thung ïa ka “Delimitation Committee bad la shim ruh ïa ki lad ki lynti ban pynkhreh la ka jong ka electoral roll naka bynta ka GHADC.
Haba pynpaw ba ïa ka Sorkar la ïalam da ki buit treikam jong u Nongïalam barim (L) Purno Agitok Sangma, u Myntri Rangbah u la ong “Ngi jied ban trei na ka bynta u paidbah ha ka jaka ban ieng pyrshah ïa ki liang pyrshah jong ngi, kiba ju kam burom ïa ki kam ba ngi trei ma ngi”.
“Ki paidbah ki ïohi ïa kaei kaba ngi leh. Ki la leh mynleh bad ki drama ban khring ïa ki briew ha ki social media, hynrei ïa ki kam ba shisha bad ki jingpyrshang jong ka Sorkar yn sa rai bad bishar da ki paidbah ka Jylla. Ka jingkut jingmut jong ngi ka ïai long kumjuh sha ki briew jong ngi, kiba la ai ka jingshaniah ha ngi”.
U la kren ruh halor ki jingkylla kiba la wanrah da ki prokram sengkam sengjam ka Jylla kiba thmu ban pynkupbor ïa ki samla bad plie ïa ka lad ïohkam ïohjam ha la ka thain kum ka PRIME (Promotion and Incubation of Market-driven Enterprises): Ka ai ïa ki jinghikai ba bniah bha, ki nongpyni lynti (mentorship), bad ka jingkyrshan ban pynkylla ïa ki buit treikam ba thymmai sha ka jingseng ïa ki kam kiba lah ban ïaid.
Nangta ka CM-Elevate kaba tyrwa ïa ka subsidy pisa (haduh 75%) na ka jingkyrshan ram ha ka kam jngohkai, ka rep ka riang bad ki service sector ban ïarap ïa ki samla ba kin trei ìa la ki jong ki kam.