Pynspong u Sirdar ka Hima Khadarlyngdoh Elaka Nongpoh Sirdarship ïa u Rangbah shnong ka Nongkhrah

Nongpoh, Naitung 17: Kum shi bynta ban pynneh ïa ka riti ka dustur ba la buh da ki longshuwa manshuwa bad ban hikai ïa ki pateng kiban dang wan ba kin tip ïa la ka riti ka dustu, u Sirdar ka Hima Khad-ar Lyngdoh Elaka Nongpoh Sirdarship ha ka sngi Saitjaiñ u la wan ban pynkup da ka spong ka phalai ïa u Rangbah shnong ka Nongkhrah ba un long kum u Rangbah Shnong ba pura katei ka shnong bad kumjuh ruh ïa ki dkhot ka executive committee ba la jied thymmai da ki paidbah nongshong shnong ka Shnong Nongkhrah ha Ri Bhoi.
Ha kane ka sngi la wan ban sakhi lang da ki nongïalam na ka Nongpoh Town Committee ba la wan mihkhmat da u bah Rayanold Kharkamni, u Bah Anthony Suchiang, Secretary Shnong Nongpoh Proper, Bah Linus Lyngdoh Secretary shnong Mawdiangum, u Bah Stoinly Roy Syngkli, Secretary ka hima khadar lyngdoh, bah trustful mangu office secretary ka hima khadar lyngdoh ,Rev. P W pnar, ki riew rangbah ki longkmie, ki Asha bad ki khun samla ka shnong Nongkhrah.
Kane ka jingpynspong ïa u Bah Celestine Syngkli bad ba la pynskhem pura ruh kum u Rangbah Shnong rygnkat ki dkhot ka executive committee, ka dei hadien ba ki la shim biang ïa ka lyngkor nongïalam hapoh ka shnong hadien ba la jied thymmai da ki paidbah nongshong shnong ka Nongkrah.
Ha kane ka sngi na ka liang u Bah Wanphrang Syiem kum u Sirdar ka Elaka Nongpoh Sirdarship haba kren ha kane ka jingpynspong ïa u Rangbah Shnong ka Nongkhrah, u la ong ba kane ka jingpynspong ka dei ka riti ka dustur bad ka dei ruh ka jingpynkupbor katkum ka aiñ na ka District Council halor ka jingjied ïa ki nongïalam Shnong bad ka long ruh shi bynta ban pynneh pynsah ïa la ka riti ka dustur.
Ha kawei ka bynta, u la kyntu ruh ïa u Rangbah shnong Nongkhrah lem bad ki dkhot ka executive committee ban don ka jingïa treilang ha poh shnong poh thaw bad ban wan rah ruh ka shongsuk shongsain karoi ka par bad kumjuh ruh ban pynneh ïa ka riti ka dustur ba la buh da ki longshuwa manshuwa jong ngi .
Na ka liang u Bah Celestine Syngkli kum u Rangbah Shnong ba la pynkup bor thymmai, u la ai khublei kyrpang ïa ki paidbah ka shnong Nongkhrah kiba la jied ïa u kum u Rangbah shnong ha ka sien kaba lai bad u la kular ruh ban trei bha ïa ka kam bad wer lang ruh ïa ki paidbah ban ai ka jingïatrei lang ha baroh ki liang. Ha kane ka sngi la pynïaid ïa ka program da I babu treibor khymdeit bad la pynwai ïa ka program da ka jingdwai kyrkhu kyrdoh da I Rev. P W Pnar.