Da ki SF-10 bad Meghalaya Battalion phah ka sorkar sha Lapangap ba shah pyndik ki paid khappud

Shillong, Jymmang 14 : Ka Director General of Police (DGP) ka Jylla, Kong Idashisha Nongrang ha ka sngi Palei ka la pyntip ba ka sorkar jylla ka la dep phah ïa ka kynhun jong ki pulit SF-10 bad ar pyrton ki pulit Meghalaya ban leit pahara sha Lapangap ha West Jaintia Hills na ka bynta ban wanrah ïaka jingshngaiñ ki paidbah kiba sah bad rep riang ha katei ka shnong ba don ha khappud bad ka Assam.
Ha ka jingïakren bad ki lad pathai khubor, ka DGP ka la ïathuh ba ïa mynta hi ki dang phah shwa tang shi pyrton ki pulit SF-10. “Ngin peit shwa ïa ka jinglong jingman bad lada donkam ngin sa phah shuh shuh kham bun,” ong kane ka hehduh jong ki pulit.
La ïathuh ba dang shen ar pyrton ki pulit Meghalaya ki la leit sha katei ka jaka. “Ka dei mynshisngi ba ngi la phah ar pyrton ki pulit sha katei ka jaka,” ka la ong.
Lah ban kdew hangne ba kane ka jingphah kham bun ki bor pahara sha katei ka thain kadei hadien ba ki nongshong shnong ka Lapangap ki la tur sha Secretariat ha kane ka sngi Balang ban pan bor pahara na ka bynta ki nongrep da kaba pynpaw ba man ka miet ki kynhun na shilliang pud ki ju wan ban pynjulor naphang ïa ki mar rep ba ki thung.
Ka DGP ka ïathuh ba ka jingphah ïa kitei ki bor pahara ka dei kaba la rai ha ka jingïalang kaba la lum da u Symbud Myntri Rangbah kaba la kyrshan lang da ka tnad pulit.
Halor ka jingdawa jong ki nongrep ban don noh da ka Police Outpost, ka DGP ka la ong ba ka Meghalaya ka lah ban leh ïa kata khamtam haba ka Assam ka la dep buh.
“Ka shong ha ka jinglong jingman bad na ka liang jongngi ruh ngin sa peit ban buh ïa ka ktem pulit,” ka la ong.
La ïathuh ba ka Barato Outpost kaba dang shu plie dang shen ka don tang kumba 16-19 kilometer ei ei na Lapangap.