Plie u Dy.CM ïa ka jingkieng bad surok thymmai hajan Umiam Tharia ban ïaid ki night super bad kali heh

Shillong, Jymmang 13: U Symbud Myntri Rangbah ka Jylla ba peit ia ka tnad Public Works Department Bah Prestone Tynsong mynta ka sngi u la plie paidbah ia ka surok bad ka Jingkieng thymmai ha dam Umiam kaba la shna kyrpang na ka bynta ban iaid ki bos night super bad kumjuh ia kiwei ki kali heh.
Kane ka Jingkieng bad jrong 76 mitar bad surok ba thymmai kaba don 2.260 km ka dei kaba don ha ki bynta ba shapoh jong ka Jingkieng kali ha damsite kaba la khang shipor ïa ki bos night super bad kiwei ki kali heh ban iaid na katei ka Jingkieng.
Ha kane ka sngi ka donlang ruh u MLA ka Umroi Bah Damanbait Lamare, Commissioner Secretary ka PWD Sanjay Goyal, Chief Engineer PWD, DC ka East Khasi Hills bad ADC ka Ri Bhoi, SP ka East Khasi Hills bad SP Ri Bhoi, ki Engineer ka tnad, ki ophisar, ki nongialam shnong bad ki paidbah nongshong shnong.
Haba kren ha ka jingialang u Bha Prestone u la iathuh ba hadien ba la khang noh ia ki bos ba wan na kylleng kumjuh ia ki kali heh ban iaid na jingkieng dam ka la mih ka jingud jingnam na ki paidbah namarba ka la ktah bha ia ka leit ka wan khamtam ba bynta ki kali kit mar.
“Kumta na ka liang ka sorkar ngi la shim ka lad ka ba kyrkueh ban phah shna da kawei ka jingkieng bad ka surok thymmai ban pynsuk leit wan ki paidbah bad kali kamai.Nga sngewkmen ba ka tnad PWD ka la thaw ia ka rekod ba tang hapoh 12 bnai ka la lah ban pyndep ia ka Jingkieng bad ka surok ba thymmai,” u la ong.
Na ka liang u Bah Damanbait pat u la ong ba ki sngewkmen ba mynta ki bos night super n akiwei ki kylla kiba hap shu ïeng ha Damsite mynta kin ioh ban kiew biang sha jaka ïeng kaba don ha ISBT bad ruh kiwei ki kali heh khlem da donkam shuh ban leit naduh bypass ter ter sha Mawryngkneng ban poi pat sha Shillong.
La ioh ruh ïa ka jingkren na u Commissioner Secretary ka PWD u Sanjay Goyal, Chief Engineer PWD Bah WR Lyngdoh bad kiwei kiwei.La pynbna ba kane ka Jingkieng bad surok thymmai kan plie na la bynta ban iaid paidbah naduh kane ka sngi Palei ka 14tarik.
Ïa kane ka jingkieng bad surok la lah ban pyndep tang hapoh 11 bnai, ïa kaba la sdang ban trei ha u snem 2025.Ïa kane ka projek la pyntrei lyngba ka skhim Special Assistance to State Capital Investment ha ka jinglut kaba kot sha ka T.24 klur.