Na kamra treikam sngap u CM ïa ki jingeh bad jingdonkam ki paidbah lyngba ka Dorbar Kyrpang

Shillong, Jymmang 13 : U Myntri Rangbah ka Jylla Conrad K. Sangma, ha ka Sngi Balang, u la pynlong ïa ka dorbar paidbah hapoh ka kamra treikam jong u bad ïakynduh ïa ki briew na ki bynta bapher bapher jong ka imlang sahlang kiba la ïalum ban pynpaw ïa la ki jong ki jingsngewkhia, ki jingeh, bad ki jingkyrpad jong ki na ka Sorkar.
Ha ka jingïakren, u Myntri Rangbah u la sngap ïa ki mat ba la pynsngew da ki nongshong shnong kiba ïadei bad ki bynta bapher bapher, kynthup ïa ka bha ka miat jong ki paidbah, ka roi ka par jong ki shnong, ki jingtei, ka kamai kajih, ka pule puthi, ka koit ka khiah, bad kiwei pat ki jingeh hala ki jong ki jong ki shnong ki thaw.
La ailad ruh ïa ki riew shimet, ki nongmihkhmat jong ki shnong, bad ki kynhun kiba wan na ki bynta bapher bapher jong ka jylla ban ïathuh markhmat ïa ki jingdonkam bad ki jingai jingmut jong ki.
U Myntri Rangbah u la ai jingkular ïa kito kiba la ashim bynta ha ka dorbar ba ka sorkar ka dang ïai bteng ban long kaba shah shkor ïa ki jingeh jong ki nongshong shnong bad ban pyntikna ba ïa ki jingeh jong ki nongshong shnong yn sa pynbeit hapoh ka por kaba biang bad ka rukom treikam kaba janai.
U la bthah ruh ïa ki heh Ophisar ba kin bishar ïa kine ki mat ba la wanrah hakhmat bad ban shim ïa ki sienjam kiba donkam ban leh haba dawa ka kam.
Ka dorbar paidbah ka long kum ka rynsan kaba donkam na ka bynta ka jingïakren markhmat hapdeng ka sorkar bad ki paidbah, kaba pyni ïa ka jingpynleit jingmut ba khlem sangeh jong ka sorkar ban ïakynduh ïa ki paidbah, ban wanrah ïa ka jingtreikam kaba shai bad ka jingsynshar kabab buh hakhmat eh ïa ki nongshong shnong.