Da ka jinghikai bakyrpang pynlong ka DREAM ha Nongstoiñ ban ïathir pyrshah ïa u drok

Nongstoiñ, Jymmang 13: Namar ka jingkynrei jong ki nongkhaï bad ki nongdih droks ha West Khasi hills ka la buh ha ka jingeh kaba khraw ïa kito ki longïng longsem kiba ki khun jong ki, ki ngop ha utei u jingdih pynbuaid bad ka la buh jingeh ruh wat ïa ka imlang sahlang. Kumta mynta ka sngi ka 13 tarik Jymmang ka ophis jong ka District Social Welfare Officer, West Khasi Hills District, ryngkat ka jingïatreilang bad ka Drugs Reduction and Elemination Action Mission jong ka jylla ka la pynlong ïa ka jingïalang kaba kyrpang ban ïathir bad ban ïaphylliew jingmut kumno ban ïaleh ïakhun bad ban rat dyngkhong ïa utei u jait jingdih ba sniew napoh ka district bad ïa ka jylla hi baroh kawei.
Ïa katei ka programme la pynlong ha Bishop hall ha ka shnong Tiehsaw. Ha katei ka sngi u bah Francis. Kharshiïng, Mission Director, DREAM Meghalaya u la ïadon lang kum u kongsan ban pynshai halor katei ka jingtreikam jong ka Mission bad u la pyshai bniah ruh ha kaba ïadei bad ki lad ki lynti kumno ban ïakhun pyrshah ïa u droks bad ban pyllait ïa kiba la ngop ha utei u jingdih pynbuaid. Haba jingpynshai halor katei ka phang u bah Kharshiïng u la ong ba ka lad kaba bha tam ban pyllait ïa ki samla ikiba la ngop ha utei u jingdih ba sniew ka long da kaba iasyllok bad ki ryngkat bad ki ba ha ïng ha sem.
Ha kajuh ka por u la ong ba ïa kino kino ki samla ikiba la ngop ha utei u jingdih ba sniew bad kiba la kyrni kat ba kim pat kwah hi ban kylla ym dei ban pah jubor ha ki jaka sumar namar ynda u la wan phai na ki jaka sumar un leh biang kumjuh bad un ïai bteng ban dih droks. Nalor kata u la ong ruh ba ka lad kaba bha tam ka long tang lyngba ka jingïasyllok bad pynsngewthuh ïa ki ba ka u droks u dei u jingdih uba pynlong mraw ïa u briew baroh shirta jingim. Ha katei ka sngi la wan ban ïashim bynta lang da u Bah H. Kharkongor, Superintendent of Police, West Khasi Hills District; u bah i Isaac Momin, Assistant Commissioner, West Khasi Hills District; ka kong. D. Pakynteiñ, District Social Welfare Officer, West Khasi Hills District; u Dr. R. Marwein; u Rev. E. W. Marweiñ, ki Rangbah Shnong, Nokma, NGO, VDP bad kiwei kiwei.
Ha katei ka sngi la ïoh ruh ban ïaphylliew jingmut halor ki jingeh kiba bun kiba ïadei bad ka jingïaleh pyrshah ïa ki nongkhaï bad nongdih droks bad la kyntu ruh ïa ki shnong ki thaw ba kin trei shitom ban rat dyngkhong ïa une u drok da kaba ïatreilang bad ki seng longkmie, seng samla, ki sengbhalang, ki bor pulit khamtam eh bad ki pulit jong ka Anti Narcotic Task Force kiba ka sorkar ka la buh kyrpang na ka bynta ban ïakhun pyrshah ïa u droks. Nalor kata la pynsngewthuh ruh sha ki nongkitkam shnong ba kin shim ïa ka jingkitkhlieh na na ka bynta ban pynsngewthuh ïa ki nongshong shong ba kin peitngor ban ym ailad ba u droks un ïoh ban rung ha ki shnong ki thaw jong ki.
U Bah Kharshiïng u la pynthikna ruh ba un sa phah ïa baroh ki jingai jingmut bad jingtyrwa sha ka Sorkar ban bishar bniah. Ha kajuh ka por u la ong ba ka mission ka thmu ban pynlong ïa ka Meghalaya kum ka Meghalaya kaba lait na U Drok ne ka “Drug Free Meghalaya” bad lada ki shnong ki thaw bad ki paitbah nongshong shnong ki don ka mon ban ïatreilang kam don jingeh bad ym don jingartatien ba tang hapoh san snem ym lah ban rat dyngkhong shisyndon ïa u droks napoh ka jylla.
Na ka bynta ban pynsgewthuh bad pynshai ha ki riew rangbah bad ki samla Garo kiba la wan na ki shnong kiba don hakhappud bad ka Assam la ïoh ïa ka jingpynshai na u Isaac Momin Assistant Commisioner ka West Khasi hills. U Momin haba ai jingpynshai ha ka ktien Garo u la ong ba haduh kine ki sngi u droks um pat da suhthied ha ki shong khappud hynrei ka don kam ba ki nongshong shnong kin long kiba peitngor bad lada don kino kino ki briew kiab wan na kiwei ki jaka bad kiba kham ishan khmat ki dei ban peit thuh bha bad ban pyntip sha ki bor synshar shnong. U la ong ruh ba ha kine ki sngi ki nongkhaï droks ki la sdang ban tur wat haduh ki shnong kiba don ha ki jaka kyndong ruh kumta ka donkam ïa ki paitbah nongshong shnong ha khappud ba kin long kiba shalak bad kiba sian namar shisien ba utei u jait jingdih pynbuaid u la ïoh ban rung ha ki shnong ki thaw ka long kaba jynjar bha ban ïaleh pyrshah.