Shillong, Jymmang 12: Ka Hid Foundation Shillong sa shisien ka la kyntu ïa ka sorkar Meghalaya ba ka dei ban pynkloi ban thaw ïa ka Meghalaya Admission and Fee Regulatory Commission kum ba la tyrwa.
Ha ka kyrwoh khubor kaba la pynmih ha ka 12 tarik u Jymmang, ka foundation ka la iathuh ba ka la ai ïa ka shithi ha ka 11 tarik u Jymmang sha u Commissioner bad Secretary ka tnad pule puthi u Vijay Kumar Mantri (IAS), ha kaba kyrpad ïa ka tnad ban pynkloi ïa ka jingthaw ïa katei ka commission.Ka faoumdation ka la pynpaw ba ka jingpyntip kaba khatduh ka dei ka jingbuddien ïa ka dorkhas kaba la aiti ha ka 24 tarik u Ïaiong.
Katkum Foundation, ïa kane ka aiñ ba la thmu dei ban wanrah hapoh ka kyrteng Meghalaya Educational Institutions (Regulation of Admission and Prohibition of Capitation Fee) Act, 2026.Ka la khot ruh ban pyntip ïa ka Meghalaya Admission and Fee Regulatory Commission Rules, 2026, ka ban trei kam ha baroh ki pule jong ka jylla, kaba kynthup ki jaka pule jong ka sorkar bad ki riew shimet.
Ka foundation ka la ong ba ka Act ba la tyrwa bad ka regulatory commission ka long ban pynthikna ïa ka jingioh ïa ka jingpule kaba bha bad ki rukom siew bai skul kiba biang na ka bynta ki samla pule ha kylleng ka Meghalaya, katba la khang pyrshah ruh ïa ka jingkhrong pisa.
Ka foundation ka la kyrpad ïa ki paidbah khamtam ïa ki kmie ki kpa ban kyrshan ïa katei ka jingdawa, da kaba pynpaw ba ka jingthmu ka long ban pynthikna ïa ka jinglah ban ioh ïa ka jingpule kaba bha bad kaba ïa ryngkat na ka bynta baroh ki nongshong shnong.
Ka Hid Foundation ka la pan ruh ïa ka jubab kaba kloi bad kaba bha na ka tnad pule puthi halor kaei kaba ka la batai kum ka mat kaba donkam ïa ki paidbah.
