Shillong, Jymmang 12: Ka Meghalaya Pradesh Mahila Congress ka la pynpaw ka jinglyngngoh ban ïohi ba ha kine ki por jong ka jingkyrduh LPG kaba jur, hynrei haba peit ka jingïadie tuh ne black market jong ki LPG, ym don satia kano kano ka jingkyrduh.
Katkum ka kyrwoh khubor ba la pynlait da ka President ka Meghalaya Pradesh Mahila Congress ka Kong Joplynn Scot Shylla ka la ong ba katba ki paidbah ki ïakynduh jingeh ban ïoh gas lyngba ki lynti ba dei rukom, ki nongdie tuh pat ki shim kabu da kaba die ha ki dor kaba rem palat haduh T. 3000-T. 4000 shi cylinder.
Ka la ong ba u paidbah ym kot bor ban siew ïa kane ka dor ba rem palat. Kumta ka Meghalaya Pradesh Mahila Congress hapoh ka jingïalam jong ka Joplyn Scott Shylla ka dawa jur ïa ki bor ba dei peit ba kin shimkhia mardor ïa kane ka jingeh bad ban pynlong ka jingtohkit kaba bniah pyrshah ïa kiba donkti ha ka jingïadie tuh LPG.
“Ka jingbym shimkhia bad jingsngap jar jong ka sorkar halor kane ka mat ka long kaba pynkhuslai bha, khamtam haba ki longïing kiba duk bad ki longkmie longkpa ki shah ktah jur na kane ka jingeh,” ong ka Kong Joplynn Scot Shylla President ka Meghalaya Pradesh Mahila Congress.
