Jowai, Jymmang 12: Ka Jowai City YMCA ha ryngkat ka jingïatreilang bad ka District Social Welfare Office, Jowai, West Jaiñtia Hills District, kala pynlong ïa ka Awareness Program halor ka phang “Mental Health and Prevention of Suicide” ha kane ka 8 tarik Jymmang, 2026 ha ka shnong Nangbah, West Jaiñtia Hills District.
Ha kane ka prokram la wan ban ïashim bynta da ki khynnah skul lem bad ki katto katne ki nongshong shnong ka shnong Nangbah. Ïa ka jingïalang plie la pynïaid da u Rev. K. Khonglah, Vice President ka Jowai City YMCA. Ha kane ka jingïalang la ïoh ruh ïa ki kyntien pdiang sngewbha na u ma Ton Roy Ïongwai u Rangbah Shnong ka shnong Nangbah, la ïoh ruh ïa ki jingkren lyngkot na u bah Shamir J Thabah Secretary YMCA NEI, Region bad na ka Mrs. Usha Rees, Managing Trustee “Love in Action Trust”, kaba long ka kongsan ha kane ka sngi.
Haba ai jingkren kum ka kongsan, ka Mrs. Usha Rees ka la ban jur halor ka jingdonkam ban sumar ïa ka jingkoit jingkhiah ka bor pyrkhat pyrdaiñ jong ki briew, khamtam eh hapdeng ki samla bad ki khynnah skul. Ka Mrs Usha Rees ka trelang bad ki HIV positive kyrpang ïa ki kynthei bad khynnah te ka ong kat kum ba ka lap ba ka khlaiñ bha ka depression bad mih ka suicide na ki jingpang, te kumta ka kyntu ïa ki khynnah ba kin sumar bha ban long kiba shait ba khlaiñ ha ka bor pyrkhat pyrdaiñ bad ha ka bor met, ka la kyntu ruh ïa ki paidbah ba kim dei ban salia ban wad jingïarap haba ki ïakynduh jingeh ha ka jingmut jingpyrkhat bad haba ki sngewsih.
Ha ka bynta jong ka Technical Session, la ïoh ïa ka jinghikai na u Dr E Dan. District Nodal Officer WJH uba long u riew shemphang halor ka phang “Mental Health and Prevention of Suicide”. U Dr. E Dan ula batai shai ïa ki daw bapher bapher kiba ktah ïa ka jingmut jingpyrkhat jong ki briew man ka sngi haduh ba ka lah ban kylla long kum ka jingpang bad kaba lah ruh ban pynlong ïa ki briew ban pyrkhat ban pynkut noh ïa la ka jingim da lade.
Ula kyntu ïa ki khynnah ba kin pynleit jingmut ha ka pule kot ym ha ka smart phone, kim dei ruh ban pyndon kam ïa ki jingdih kum u sikret bad kiwe kiwei ki jingdih pynbuaid, ki dei ruh ban jied sani bha ïala ki jong ki paralok da kiba bha ka jinglong ka akor bad ruh kiba lah ban ïarap ha ka por ba ki don depress ne jingeh.
Ha kane ka sngi la pynlong ruh ïa ka jingïakob dro jingïatai dur halor ka phang “Mental Health and Prevention of Suicide”. Ha kaba ïa ka nam ba nyngkong la ïoh da u Samhao Phawa jong ka Halari U.P School, ïa ka nam ba ar la ïoh rah da u Defender Hinge jong ka Halari U.P school bad ïa ka kyrdan balai pat la rah da u Michael Kyndait jong ka A.L.M.S. School, ïa ki khusnam bad ki Certificate la sam sha ki nongjop da ka kongsan.
La pynkut ïa ka prokram, la ïoh ïa ki jingkren lyngkot bad ka jingduwai na u Rev. G.S. Shyllai, General Secretary ka Jowai City YMCA.
