Shillong, Jymmang 11: Da kaba kynnoh ïa u President ka VPP u Bah Ardent Miller Basaiawmoit ba ula pynkylla ïa ka kynrum kynram ha ka Hima Sohra kum ka jingleh politik ha surok” u Nongaibuit jong ka Synjuk ki Khlieh Nongsynshar Hima Sohra, u Paiem Laborious Manik S Syiem, mynta ka Lah Sngi U Blei, ula ong, ba ka kynhun ka ïakhun ban ïada ïa ki sankyrwoh ka saiñ Dorbar u Khun khasi ym ban myntoi ei ei ha ka kam politik.
Haba ïakren bad ki nongpathai khubor, u Paiem Laborius Syiem ula pynphai nia kylla ïa ka jingkynthoh u Bah Basaiawmoit ha ka 7 tarik u Jymmang ha Mawlai, da kaba ong, “Ngi ngin ym ïa pynmillai khleh jaktung ha ka jingleh politik ha ki surok ne ha kano kano ka jingleh politik kano kano ka seng saiñ pyrthei kaba phi lah ban khot kyrteng”.
“Ka jingïakhun ka jong ngi, ka dei ka jingaiti lut ban pynthikna ba ka jingleh politik kam dei ban ïoh rung shapoh ban pynjot ïa ki 5 tylli ki sankyrwoh ka saiñ Dorbar u Khun Khasi: (i) Dorbar Ïing, (ii) Dorbar Kur, (iii) Dorbar Shnong, (iv) Dorbar Raid, bad (v) Dorbar Hima bad ong ba “Ki la ïaineh ïa ki jingtynjuh jong ka por bad ïa ki spah snem’ bad ki dei “ka borbah kaba tehsong ïa ki Khun ki Ksiew Hynniew Trep Hynniew Basa.”
Ula ong, ba ka Synjuk kan ym shah ban don kano kano ka jingtuklar da kiba nabar ïa ka riti bad ïa ka jingleh kaba naduh hyndai hynthai.
“Ngi ïengskhem ha ka jingïakhun ka jong ngi ban batskhem bad ban ïada ïa kitei ki riti tynrai kyntang pyrshah ïa kino kino ki bor kiba thmu ban bujli noh da kumwei pat”
“Lada ki hok ki riti, ki riti ki dustur ki duhnoh ki jingneh ki jingsah ki jongngi kin sdien ha ka lyer”. Ula ong, ba ka kynhun ka la leit tur sha KHADC ha ka 7 tarik u Jymmang ban pyrshah ïa ka jingleh bymhok.
“Ka Dorbar Khlieh ki Nongsynshar Hima Sohra bad ki khun ki hajar ka la ïeng pyrshah ïa ka jingleh bym hok jong ka KHADC pyrshah ïa ka jingkordor ka tynrai jong ka jingjied ïa u Syiem da ka Hima Sohra,” la ong u Paiem Laborius Syiem.
“Ngi tur sha District Council ban dawa ba ïa kane ka jingleh bym hok dei ban pynbeit noh mardor”.
Ula pynrem ïa u Bah Basaiawmoit halor ka jingpynkylla mat politik ïa kane ka kam. “Katba ngi dang wad ïa ki lad ban pynbeit na ki bor kiba dei khmih, ka long kaei kaei kaba sngewsih bad i saitmet, ba phi lah jied ban pynman ïa kane kum ka mat jong ka seng ha ka por ba ai jingkren kynthoh ha ka politik ne ‘Political Hate Speech” ha Mawlai,” ula ong.
“Ka kamram ka jong nga kam dei ban pynshisha ba nga dei, ka kamram ka jong nga ka dei ban ïai bat ïa ka dongmusa tad haduh ba ki “khun ki hajar ka ri u laiphew syiem bad khat ar doloi” kin lap bad ïaid ha ka lynti kaba dei” la ong u Paiem Laborius.
Da kaba kam ïalade kum uwei na kiba hiar pateng na ka “Kur Syiem,” ula ong ba ula shim ïa ka kamram ban ïada bad batskhem ïa ka riti bad dustur kaba tehsong lang ïa baroh ki paitbah.
“Bah Ardent, ha ka jingkthong ka jong phi ïa ka shuki saiñ pyrthei (Political Chair), i kumba phi kloi ban ïuhroit ïa ki sankyrwoh ki sankyrdan ka saiñ dorbar kiba pynthikna ïa ka jingneh ka jingsah ka jong ngi” ula ong.
“Phi la pynthohbria ïa ka jinglong shida bad ka jingdawa hok jong ‘ki khun ki hajar ka Hima Sohra” ban ïohnoh ïa la u jong u Syiem uba ki la jied hok ha ka nongrim ka riti ka dustur bad ka niam jong ka Hima Sohra”.
U Paiem Laborius Syiem ula kyntait ïa ka jingkynnoh ba ki paitbah kiba la leit tur sha KHADC ki dei kiba don jingïadei bad kano kano ka seng saiñ pyrthei. “Phi pynman ïa ki briew kiba luilui kum ki briew jongka NPP, phi lah pulom ha ka ban ïohi ïa ka jingshisha ba ka jingtehsong ka jongki kam dei na ka politik seng saiñ pyrthei, hynrei ka jingieid ka jongki ïa ka hok ka riti, ka riti ka dustur kaba la phrang ha ki jingtyllun jong ka por kaba la ïoh pateng na ki longshuwa manshuwa kaba la pynshong nongrim ha ka jingstad jong uba rim u bastad ki kpa tymmen ki jong ngi” ula ong.
Ula buh jingkylli ïa ka jingtuklar u Bah Basaiawmoit, da kaba ong, “Ki la leit sha KHADC ban dawa ïa ka sanad ne ka kot pynskhem, ka kamram jong ka District Council ka dei ban pyndep. Phi dei u MLA, phim dei u MDC, ka bynta jong phi ka dei ha Meghalaya Legislative Assembly. Balei phi wan tuklar hangne?”.
Haba kyntait ïa kano kano ka jingdon bynta bad ka seng saiñ pyrthei, u Paiem Laborius Syiem ula ong, “Ka long kaei kaei kaba sngewsih ba phi lah kynnoh ïa ki paidbah ba lui lui ka Hima Sohra kum ki nongkyrshan ka NPP. Ha kajuh ka por phi kynnoh ba nga dei u dkhot ka NPP. Hangne ngan ong da kaba shai kdar ïaphi bad ïa baroh ba ngam dei kumta”.
“Ka jingkitkhlieh jong nga ka long barabor ban ïeng pyrshah ïa kano kano ka jing shah lehbeiñ bym shong riti bad bym shong nongrim jong uno uno ne kano kano ha kano kano ka rukom” ula ong.
“Nga ong ïa phi pynbeit noh mar mar ïa kane ka jingkynnoh bad kiar raimaw raidieng noh ban kynnoh kumne naduh kane ka khyllipmat, namar lada phim leh ïa kane, kynmaw ba “ha ka hok ka shi kyntien, ka jingjler bad ka jingthok kan sa bishar bad kyrtoh kylla ïa phi” la ong u Paiem Laborius.
