Mawkyrwat, Jymmang 09: Ka District Congress Committee (DCC) jong ka South West Khasi Hills District, kaba kynthup ïa ka Mawkyrwat Block Congress Committee (BCC) bad ka Ranikor Block Congress Committee (BCC), ka la pynlong ïa ka jingïalang ba kyrpang ha ophis treikam jong ka party ha Mawkyrwat.
La pynlong ïa kane ka jingïalang da ka jingthmu ban pynkhlaiñ ïa ka party hapoh ka district bad ban pynkhreh na ka bynta ka jingïakhun ha ka Bye-Election ne ke elekshon shiteng samoi na ka bynta ka Shillong Parliamentary Seat.
Hadien ba la wai ka jingïalang, u Bah Kynpham V Kharlyngdoh, President ka District Congress Committee, South West Khasi Hills District, ha ryngkat ka jingïadonlang u Bah Arful Syiemlieh, General Secretary, u Bah Nicholas Tympuin, President ka Mawkyrwat Block Congress Committee, bad u Bah Poland Khar Ryja, President ka Ranikor Block Congress Committee, u la pynpaw ba kane ka Bye-Election MP kan long ka jingïakhun kaba itynnad bad kaba khluid bha hapdeng ki party bapher bapher.
U Bah Kynpham u la ong ruh ba kane ka jingïalang ka long ruh kum shibynta ban ïa tai sani ryngkat ka jingthmu ba kin sa mih ha u paidbah ban pan ka jingkyrshan na ka bynta u kyrtong ba ka INC ka Central Body kin sa pynbna shen. Shuh shuh u la ong ruh ba katba kiwei pat ki party saiñ pyrthei kum ka National People’s Party (NPP) bad ka Voice of the People Party (VPP) ki la dep pynbna ïa la ki jong ki kyrtong, ka Indian National Congress ruh ka la trei shitom ban pynkhlaiñ ïa ka party bad kan sa jied bad pynmih ïa u kyrtong uba biang tam ban mihkhmat ha kane ka Bye-Election na ka bynta ban jied ïa u nongmihkhmat paidbah sha ka Lok Sabha na Shillong Parliamentary Constituency.
Ha kawei pat ka liang u bah Kynpham u la ong ruh ba ka Congress ka don ka jingkyrmen kaba skhem ba da ka jingïatreilang jong ki nongkitkam bad ki dkhot ka party, kan lah ban pyni ïa ka jingïaineh bad jingïatylli ha kane ka elekshon ban wan.
Namarkata, ula buh ka jingkyrpad na ka bynta ki paidbah nongkyrshan ba kin ai lem ka kti jong ka jingïatreilang da kaba kin kyrshan ïa u kyrtong jong ka congress ïa kaba kum ka party kan sa pynbna shen.
