Shillong, Jymmang 10: U Samla Basuklang Khongwar u Vice President ka KSU South East Central Circle u la ong ba ka KSU ka kyntu ïa ka National Highways & Infrastructure Development Corporation Limited (NHIDCL) ba kan shim khia bha halor ka jingpyntrei ïa ka surok na Shillong sha Dawki khamtam eh ha ka thaiñ Pynursla, khamtam hadien ba la mih ki jingïap jong ki briew ha kine ki por ba la leit na ka jinghab ki maw ba la pynbthei haba la shna ïa ki surok kiba long riat naba kane ka la ktah bha ïa ki paidbah.
Haba kren sha ki Lad Pathai Khubor u Vice President u la ong haba kynduh ïa Executive Director la dep ban ïatai sani bha halor kane ka jingeh kaba ïadei bad kane ka surok bad la ai jingmut ban tih slope ïa ki surok, nangta ban shna kyndon ha ki jaka kynroh ba long riat khnang ba kan ïarap ïa kane ka surok ha ka por slap.
U la ïathuh ba la ai jingmut ba na ka jaka jong u Bah K. Lyngkhoi kaba dei na Pomlum ka company ka dei ban shna shwa da ka surok ba shipor ban pynsuk ïa ki paidbah bad ïa kane la jingai jingmut la pdiang haba yn sa ïakren bad ka Sorkar jylla.
U la pynpaw ka jingkmen ruh hadien ba ka kompeni ka la pdiang ban ailad ïa ki kontraktor na jylla haduh 7 ngut na ki 10 ngut ba la jied bad ba kin ïatreilang bad ka tnat PWD kaba don ha ka thaiñ Pynursla.
U la kyrpad ïa ki paidbah khamtam kito kiba donkam bai lutksan ïa ki jaka ba kin ïakren bad SDO Civil khnang ban dang ailad ïa ka kompeni ban shna ïa ka surok.
Shuh shuh u Bah Khongwar u la ong ba u Executive Director ka NHIDCL u la ïathuh ba la dep ïakren bad u Symbud Myntri Rangbah ka sorkar jylla u Bah Prestone Tynsong halor ka jingdonkam ban ïatreilang lang ki ophisar ka Sorkar jylla bad ka kompeni NDHIDCL khnang ba ka kam kan ïaid beit.
Haba phai sha kawei ka surok kaba don ha ka thaiñ Rngaiñ khamtam ka jingtwa u Maw ha ka por ba pynbthei na ka liang ka kompeni ka la dep ban pynkhuid hynrei haba ïadei pat ki jingtwa sha kiwei pat ki jaka ba khlem siew bai lutksan ka kompeni kan lah ban shna na ka daw ba ki trai jaka kim shah ba ki khlem ïoh bai jaka, khamtam eh ki jaka ba long riat.
“Kumta ngi kyrpad ïa ki paidbah ban ïatreilang bad yn ïa pynbeit ïa ka bai siew jaka bad ban pynbeit ruh bad u SDO Civil. Ngi kwah ba ka Sorkar jylla kam dei ban tei pop markylliang halor ka jingjia ba sngewsih ha kine ki sngi kiba la jia sha kine ki thaiñ halor ka jingshah shim ki jingim briew naba twa bad hap ki maw, ha kaba ka jingtei bad maramot ka dang ïaid,” ong u Vice President ka KSU.
U la ïathuh ruh ba ka jingeh haba trei ïa ka surok ka long ba ka kompeni kaba la ïoh ka lad ban shna ïa ka surok kam ïatreilang bad ka NHIDCL naba ka long tang ka Agency, bad ym lah ban leh eiei naba hap ban ïakren shaduh ki bor ba halor, ki bor ka Ministry of Transport ka sorkar India halor kane ka kam.
U la ïathuh ba ïa mynta shipor la pynïaid na ka surok kaba la twa watba la don ka jingweng ïa ki maw, hynrei kumba long mynta kam pat shngaiñ ban ïaid.
