Ka jingbishar kam dei tang ïa kiba lehkam sniew bad kam dei ban noh shilliang: CJI

Nongpoh, Jymmang 10: U Justice Surya Kant, Chief Justice ka ri India ba dei ruh Patron Chief ka NALSA mynta ka sngi u la wan ban iuhkjat ha Ri-Bhoi District ban shim bynta haka Mega Camp cum Awareness Programme ban pynshai paidbah ïa ki skhim ka NALSA bad ki skhim sorkar halor ka phang “Bridging the gap” bala pynlong da ka High Court of Meghalaya bad ka Meghalaya State Legal Services Authority ha madan heh ha Marngar.
Ha kane ka prokram la wan ruh ban shim bynta da u Justice Ujjal Bhuyan, u ba dei u Judge ka Supreme Court of India kum u symbud kongsan, haka jingdonlang ka Justice Revati Mohite Dere Chief Justice ka High Court of Meghalaya, u Bah Lakmen Rymbui, Myntri ka tnad aiñ ka sorkar jylla, u Justice HS Thangkhiew Judge ka High Court of Meghalaya, u Bah Mayral Born Syiem MLA ka Nongpoh, ki ophisar na ka district, ki nongïalam shnong bad kiwei kiwei, ryngkat hajar ngut ki paidbah kiba la wan ban sakhi na kylleng ka dong Ri-Bhoi.
Haba kren ha kane ka sngi naka liang u Justice Surya Kant, Chief Justice ka ri India u la ong ba ka jingbishar kam dei tang ïa kiba leh kam sniew, hynrei baroh kiba donkam ka jingïarap katkum ka article 39 A jong ka riti synshar ka ri India ba ki nongshong shnong shynrang bad kynthei marryngkat ki don ka hok ban kyrshan ïaka jingim.
U la ong ruh ba baroh ki skhim jong ka Legal Aid ki dei ban poi haduh jingkhang iing jong ki briew kiba donkam ïaka jingïarap, bad bunsien ka jing jngai jong ki ophis sorkar bad ka jingpynbunkam jong ki ïaki paidbah khamtam kiba duna ka jingnang jingtip ka dei kawei naki jingeh bad ka jingshah kyntaid jong ki paidbah ban ioh ïaka hok, kumta ki jinghikai bad ka jingai jingtip sha ki paidbah shaphang ki skhim ka long kaba kongsan kumba ka phang jong kane ka program ka long ban pyndap ïaki jaka kiba lait bad kiba duna.
Ha kane ka sngi la sam ruh ïaki tiar ban kyrshan ïakiba duna khot met kum ki diengduh, ki whellchair bad kiwei kiwei, kumjuh ruh ka cheque ba 54 lakh sha ki SHGs bad VOs ryngkat ki syrnod sha ki Best Performing Legal Aid Panel Lawyers, Para-Legal Volunteers (PLVs), Lawyers from Legal Aid Defense Counsel (LADCs) ha u snem 2025 bad plie ruh ïaka iew jong ki nongrep, ki SHGs, ki tnad sorkar bapher bapher ban pynjan ïaka jingtip ha kaba ïadei bad ki skhim sha ki paidbah.