Shillong, Jymmang 10 : Ka Chairperson ka Meghalaya State Commission for Protection of Child Rights Ka Agatha K Sangma ha ka sngi Saitjaiñ ka la ong ban khang lad bad pynduh ïa ki kam bret khun ka dei ban don ka jingïatrei lang jong baroh ki kynhun ba don bynta, kynthup ki lad pathai khubor bad ka la kyntu ïa baroh ban sngap ïa ki jinghikai bad pynsngewthuh ïa ki khynnah kynthei ba dang rit.
Haba kren halor ka jingjia ba dang shen ba bret ïa I Khunlung, ka Agatha kala ong ba ka Commission kala shimkhia bha ïa kane ka kam.
“Na ka Commission ngi la shimkhia bha bad ka dkhot jong ngi kaba dei na Ri-Bhoi District, ka la leit dalade bad ïakynduh ïa ki bahïing hasem” kala ong.
“Ka DPCU ka la shimkhia, bad ka la pynthikna ruh ïa ka jingai jingïasyllok ïa ka Kmie kaba la bret ïa la I Khun” kala ong.
Ka Agatha ka ong ba ki jingpynsngewthuh bad ka jingai jinghikai ki long kiba donkam ban lah tehlakam ia kane ka kam bret khunlung .
“Kane ka dei ka kam kaba donkam ïa ka jingïapyrshang lang na baroh ki liang kynthup ki lad pathaikhubor” kala ong.
Halor ka jingjia ha Ri-Bhoi, ka Agatha ka la ong “Kane ka jingjia ka dei kaba kyrpang ha kaba ka Kmie ka la kem tieng, kala tieng bad shim ïa kato ka rai bad ka long kaei kaei kaba sngewsih. Nga kyrmen ba ka rukom treikam ka sorkar kan kham shim khia ban thaw ki lad ki lynti khnang ba kin lah ban shim ïa ka rai”
Haba kylli la ka Commission kan nang shim shuh shuh ïa ki sienjam, ka Agatha ka la ong “ïa mynta, ngim pat rai satia. Kane ka dei kawei na ki jingjia kiba jia, hynrei lada ki nang ïai jia, ngin hap ban leh eiei”.
Halor ka hukum ka High Court ba dang shen ba ïadei bad ka jingïashongkha khynnah, ka Agatha kala ong “Ka High Court ka la shim khia bha ïa kane bad mynta ïa ki case Romeo-Juliet yn ym kheiñ shuh kum ki case POCSO” kala ong.
“La ai mynta ïa ka jinïasyllok ïa ki shujur ki bym dei ki case POCSO namar ba ki dang dei kiba dang khynnah ka rta” kala ong.
