SSA U-20 4th Divisoon Football League 2026: Khur jingjop ka Them Rangshken SC bad ka Thynroit SC

Shillong, Jymmang 10: Ka Them Rangshken SC bad ka Thynroit SCC ki la jop ïa la ki jong ki jingïalehkai ha ka lympung U-20 Fourth Division 2026 ba la pynïaid da ka Shillong Sports Association (SSA), kiba la long ha ka sngi Saitjaiñ.
Ka Them Rangshken ka la lah ba kan pynliem noh da 2-1 kol ïa ka Phir Kurbah Memorial ha ka jingïakhun jong ka Group A, nangta ka Thynroit ka la jop da 2-0 kol pyrshah ïa ka Lumpyngngad ha ka Group B.
Kawei pat ka jingïalehkai ka kut ha ka jingïakhaid khlem kol hapdeng ka Laitlulong bad ka Don Bosco Academy ha ka Group B ha MFA Ground.
Haba phai sha ka jingïalehkai ba nyngkong ha SSA Stadium, u Mebadonbok Malngiang (2′) u la pynkhihjar dang kloi na ka bynta ka Them Rangshken hynrei u Richborn Kurbah (43’) u la pynïakhaid shipor na ka bynta ka Phir Kurbah. Hynrei u Richmond Khongsit u la pynthikna ïa ka jingjop na bynta ka Them Rangshken da kaba pynkhihjar ha ka minit kaba 65.
Nangta ka jingïakhun hapdeng ka Thynroit bad ka Lumpyngngad, u Pynshaikmen Nongrum (73′) bad u Banraplang Suting (77′) ki la pynkhihjar mar shi sien ban pynïoh ïa ka jingjop na ka bynta ka Thynroit ha ka Group B.
Ki jingïalehkai group stage jong ka SSA U-20 Fourth Division 2026 kin wanphai biang lashai ka sngi Ba-ar da ar tylli ki jingïalehkai ban sdang ha ka por 4 baje janmiet. Baroh ar kin dei jong ka Group C, ha kaba ka Madanrting SC kan aireng pyrshah ïa ka Nongthymmai SCC Nongkynrih ha MFA Ground, nangta ka Golflink SC pyrshah ïa ka Weilyngkut Area FCC ha SSA Ground.