80 klur tyngka ban pynheh shuh ïa ka Umroi Airport bad sdang pyntrei ïa ka surok ba pynïasoh bad Shillong bypass

Shillong, Jymmang 08 : U Symbud Myntri Rangbah ka Jylla ba peit ïa ka tnad Transport, Bah Sniawbhalang Dhar ha ka sngi Palei u la ong ba ïa ka work order na ka bynta ban pynheh shuh shuh ïa ka Umroi Airport kaba kot sha ka 80 klur eiei la dep ban aiti ai ka kam bad shen la khmih lynti ba ka kam kan sdang noh.
Haba kren bad ki lad pathai khubor, u Symbud Myntri Rangbah u la ong ruh ba ka jingpyntrei ïa kane ka kam ka lah ban sdang noh shen ha kaba la buh ban pyndep noh ïa ka hapoh ki 18 bnai naduh ka sngi ba ki aiti ïa ka work order.
Na ka liang u Symbud Myntri Rangbah haba jubab pat halor ka surok ba pynïasoh sha airport na Shillong bypass, u la ïathuh ba halor kane ruh ka kam ka la ïaid shakhmat.
“Ka kam ka la ïaid shaid shaid bad ka surok na Belfont – Langkyrding kaban mih sha Secretariat ba thymmai bad nangne pat sha airport. Na bynta kane haduh 135 klur tyngka la mang da ka tnad PWD.
Haba ïadei pat bad ka jingshim jaka na ka bynta ban pynheh ïa ka kad liengsuin, u Symbud Myntri Rangbah u la ong ba donkam shwa ka jingleit jurip lang ha shwa ban jied ïa ka jaka.
“Ha u bnai ba la dep nga la dep ong ïa Deputy Commissioner ban peit biang bad pynlong ïa ka jingleit jurip lang bad ka Airport Authority of India ban jied ïa ka jaka kaba yn shim shuh ha shwa ban shimti ïa ka jaka,” u la ong.
Katkum ka jingong jong u, ha shwa ba kin shim ïa ka jaka donkam shwa ka jingleit jurip lang hapdeng ki heh ka sorkar jylla bad ka Airport Authority of India khnang ba ngin ym shim ïa ka jaka ka bym dei.