Dawa ki khun ki hajar ka Hima Langrin na u CEM ban pyllait noh ïa ka kaiphod jingtohkit

Shillong, Jymmang 8: Ki khun ki hajar ka Hima Langrin kila kyrpad ïa u Chief Executive Member (CEM) ka Khasi Hills Autonomous District Council ba kin pyllait paidbah ia ka kaiphod jingtohkit pyrshah ia u Nangtei Sing Syiemiong uba dei u Syiem uba la shah sospon halor ka jingkynnoh pyndonkam bakla ia ka pisa jong ka Hima.
Ha ka sngi Thohdieng ka 8 tarik u Jymmang kane ka kynhun kala ia kynduh ia u CEM u Bah Winston Tony Lyngdoh bad kila buh ruh sa kawei ka jingkyrpad ban weng noh shi syndon ia u Nangtei Sing Syiemiong ba la shah sospon kum u Syiem jong ka Hima Langrin bad ban pynlong da ka election ban jied ia u Syiem Rangbah ba thymmai jong ka Hima.
Na ka liang u Bah Faindness Syiemiong haba kren ha ki lad pathai khubor u la ong, ki khun ki hajar ka Hima Langrin kiba la soi ïa ka kot jingujor ha ka 05.07.2023 pyrshah ïa u Nangtei Sing Syiemiong (Suspended Syiem) ha ryngkat ka Seng Samla Hima Langrin kiba la soi palat 1000 tam ki khlieh shynrang bad ba ka Executive Committee jong ka Khasi Hills Autonomous District Council, bad ha ka 18.08.2023 ka la weng noh shipor bad phah da ka Judicial Inquiry ha Khasi Hills Autonomous District Council Court Mawkyrwat.
Katkum ka jingtip ïa kane ka inquiry na ka liang u inquiry officer kala dep ban bishar ha u snem 2025 bad ruh kala dep ban aiti ïa ka kaiphod sha ka Executive Committee, jong ka KHADC ha ujuh u snem.
U Bah Syiemiong u la ong, na ka liang ka Executive Committee, KHADC, ka la phah ruh ïa ka Show Cause ïa u Bah Nangtei Singh Syiemiong (Suspended Syiem) halor ki katto katne ki daw ban pynshai khamtam ha kaba ïadei bad ka jingpyndonkam bakla jong u ïa ka pisa kaba T. 7, 38, 73, 310 klur jong ka Hima.Kumta kane ka jingleh jongu ka la pynkhein ïa ki kyndon katkum ka Sanad thung Syiem.
Kumjuh ruh kumba ngi la ïa soi paidbah ha ki por ba la dep ba ngi la duh ïa ka jingshaniah pyrshah ïa u Nangtei Singh Syiemiong, mynta ruh ngi pynsngew ïa kajuh ba kum ki khun ki hajar jong ka Hima ngi dang ïai pyrshah bad dawa biang na u CEM ba dei ban weng noh shi syndon ïa u bad ban pynlong noh da ka Election jied Syiem thymmai khnang ba kan wanrah ia ka shong suk shong sain.
Shuh shuh u Bah Syiemiong u la ïathuh ba u CEM u la kular ba un sa pyllait paidbah noh ïa ka kaiphod jong ka jingtohkit bad u la pynpaw ruh ba ka jingsynshar tang da ki Acting ka wanrah ïa ka jingdkoh ka rukom trei hapoh ka Hima.
Na ka liang u Bah Baldwistar Syiemiong u la pynpaw ba ka jingpyndonkam bakla jong u Syiem ba la shah sospon kadei ïa ki khajna ba ka hima ka ioh lum na ki marpoh khyndew kum u Dewiong, Mawshun bad kiwei kiwei kaba kot palat 7 klur, hynrei na ka liang u Bah Nangtei u la kam ba 50% kadei ka bynta jong ka kmie jong u bad kaba 50 % kadei jong ka Hima.
“Dei halor kane ba ki khun ki hajar jong ka Hima Langrin kim lah ban pdiang ïa kane ka jingkam u Bah Nangtei kaba la pynlong ïa ki khun ki hajar ban ujor pyrshah ïa u” u la ong.