Shillong, Jymmang 8 : U Symbud Myntri Rangbah ba khmih ïa ka tnat Transport yu Ma Sniawbhalang Dhar ha ka sngi Thohdieng, ula ong ba ka Sorkar kan nym leh da ka bor haba ïadei bad ka projek lynti Rel ha ri lum Khasi-Jaiñtia, da kaba ban jur ba ka jingpyntreikam kan shong ha ka jingshim rai lang jong baroh kiba ïadon bynta lang.
Haba kylli shaphang ka jingthmu ban pynpoi lynti Rel ha rilum Khasi-Jaintia, u Ma Sniabhalang ula ong “Ngi dang ïakren bad ki kynhun kiba son bynta lang. Dei na kata ka daw ba ka Sorkar kam don jingthmu ban leh daka bor. Ngi ju kynthup lang ïa baroh ha kano kano ka rai. Kane ka dei ka Sorkar jong u paidbah.”
U la pynthikna ba la thaw ïa ka All Party Committee ha u snem ba la dep ban ïakren ïa kane ka mat. “Hooid, la thaw ïa ka Committee jong baroh ki seng saiñ pyrthei ha u snem ba la dep. Ka shim por. Ka lah ban donkam 10-15 tylli ki jingïalang namar ngi donkam ban kynthup lang ïa baroh haba shim ïa kano kano ka rai” u la ong.
Haba kylli, balei ba ka thain Garo Hills ka paw ba ka pdiang ïa ka projek lynti rel, u Symbud Myntri u la ong, “Ki briew jong ngi ki ïapher na kawei ka jaka sha kawei pat. Kumta donkam ban pynsngewthuh ïa baroh ki trai shnong. Dei na kata ka daw balei ba ka shim por. Man la ki projek thymmai ki shim por ban ïoh sdang treikam.”
Haba kylli hato ka Sorkar kan dang pynroi shuh shuh ïa ki lynti Rel ha Garo Hills, u la ong “To ngin sa peit”.
