Tang hapoh 7 sngi ba phone u Conrad, pynïasoh u Dr. DRL Nonglait sha ka ktem NPP

Shillong, Jymmang 7: U National President ka National People Party (NPP) uba dei ruh u Myntri Rangbah ka jylla u Conrad K Sangma u la pynbna paidbah ïa ka kyrteng jong u Dr. D.Rockyer Lyngdoh Nonglait kum u kyrtong jong ka party na ka bynta ka election MP shiteng samoi na Shillong Parliamentary seat.
Ïa kane u Conrad K Sangma u la pynbna ha ka jingïalang jong ka Central Executive Council jong ka National People Party kaba la long ha ka 7 tarik u Jymmang ha phyllaw jong ka State Central Library, Shillong.
Ha shwa ban pynbna paidbah ïa u Dr. DRL Nonglait, la ioh ban pynrung shwa ïa u hapoh ka sem jong ka NPP da u State President u Bah Prestone Tynsong ha ka jingsakhi lang u Conrad K Sangma, u Bah Sniawbhalang Dhar, u Bah Hamlet Dohling, ka Kong Grace Mary Kharpuri bad u Bah Wailadmiki Shylla ki Myntri sorkar bad MLA/MDC ka party, ki nongialam ka Party na ki Block Bapher bapher jong ki 36 tylli ki Constituency bad ki hajar hajar ngut ki paidbah nongkyrshan ka party.
Kum ban shu kdew ba ïa u Dr. DRL Nonglait hapoh ka jingialam u Bah Hamlet Dohling bad u Bah Himalaya M Shangpliang ha ka sngi Thohdieng ba la dep kila leit ban kyrpad bad khroh ïa u Dr. Nonglait uba dei ruh u President ka Khasi Author Society ban ïakhun na ka party ha kane ka election MP shiteng samoi, hynrei dei ha ka miet sngi Balang u Dr. Nonglait u la pdiang ïa kane ka jingtyrwa.
Na ka liang u National President ka NPP u Conrad K Sangma ha shwa ban pynbna ïa ka kyrteng u Dr. Nonglait u la ong,Hadien ka jingmynjur jong ka state committee nga tyrwa ïa ka kyrteng jong u Dr. DRL Nonglait ba un long u kyrtong na ka bynta ka MP election shiteng samoi ka ban sa long bad da ka jingmynjur jong ka Central Executive Council jong ka ri lum Khasi bad Jaintia bad ka jingmynjur na u State President, nga pynbna paidbah ba u Dr. DRL Nonglait un dei u kyrtong ka NPP ha ka election MP shiteng samoi.
Haba kren hadien ba la dep ban pynbna kum u kyrtong jong ka NPP u Dr. Nonglait u la ong, ba dei ha ka 30 tarik u Iaiong u la ioh pdiang ïa ka phone na u myntri rangbah bad kham hadien u sa ai kren pat ha u Bah Prestone Tynsong bad hadien shi sngi wan pat sa ka kynhun ba 20 ngut ba kyrpad ïa nga ban ïakhun ïa ka MP election ba shiteng samoi.
U Dr. Nonglait ula kular ban trei na ka bynta “ka bha ka miat ki paidbah bad ka Jylla” hadien ba ka National People’s Party (NPP) kala pynbna paidbah ia u kum u kyrtong ban aireng ha ka elekshon shiteng samoi ka Shillong Lok Sabha.
Haba shim ïa ka jinglong kyrtong kum ka “jingkitkhlieh kaba khraw”, ula bynrap “Kane ka jinglong kyrtong ka dei ka jingmyntoi shimet, ka dei ka jingkitkhlieh kaba khraw na ka bynta ki paidbah bad ka Jylla.Nga pdiang ïa ka da ka jingaiti lut bad ka jingkut jingmut ban trei na ka bynta ka bha ka miat ki paidbah bad ka Jylla bad ruh na ka bynta ka jingangnud jong baroh”.
U Dr Nonglait ula ong ba ka jingiaid ïalap elekshon jong u kan pynleit jingmut ha ki mat ba kongsan jong ka Jylla.
“Katto katne na kine ki mat kiba ngan trei khlem shongthait ki kynthup ïa ka jingdawa ban pynrung ïa ka ktien Khasi ha ka khyrnit ba phra ka riti synshar ka ri India, ka jingpynkylla ïa ka pule dangle naduh ka kyrdan Elementary haduh ka kyrdan Higher Secondary bad ban kyntiew ïa ka Higher & Technical Education hapoh ka Jylla” ula ong.
“Ngan ieng ïakhun ruh ban bat ïa ka jingburom niam hapoh ka Ri.Ka ILP ka dei kawei ka mat kaba ngan shimkhia bha, ka jingpynkupbor ïa ki samla, ka jingïakhun ban pynneh pynsah ïa ka jinglong ba kyrpang ki trai ri trai muluk bad ka jingkiew shaphrang ha baroh ki liang jong ka Meghalaya bad ka Ri” ula ong.
U Dr Nonglait ula pdiang ruh ïa ka sienjam jong ka Sorkar Jylla ban seng ïa ka State University.
“Ka rai jong ka Sorkar ban seng ïa ka State University ka dei uwei kawei pat u mawmer bad ka jingsdang da ka jingsngew rit.Lada nga lah ban iatrei bad ka Sorkar, Ngan pynthikna ba ka State University kan kot ïa ka kyrdan bad kiwei pat ki Central University hapoh ka Ri” ula ong.
Haba batai ïa ka jingrung jong u sha ka jylli sain pyrthei, u Dr Nonglait ula ong “Nga la sakhi ïa ka jinghiar dor hapdeng ki briew, bad ka kam sain pyrthei ka dei kawei na ki atiar kiba khlain bha ban pynwandur ïa ka imlang sahlang.Haba khmih ïa ka jinglong jingman, Nga la rai ban iasoh bad ka NPP bad ban ïakhun ïa ka elekshon shiteng samoi da ka jingthmu bad jingaiti kaba shai – ban long ka mluh bad ka jingshai”.