Shillong, Jymmang 07: Ha ka 3 tarik mynta u bnai ha ka por 5 baje mynstep, ki pulit ki la pynlong ka jingtalasi ha Mawkasiang-Mawdiangdiang Junction (EKH) bad ki la ïoh khang kdong ïa kawei ka local taxi kaba don u nombar ML-05L-3290 ba la ñiah da u Bah Starwell Khyriem ba la 30 snem ka rta ha ryngkat bad ki iron pillar frame rod ba la suba ba u la shim napoh kawei ka jaka shna jingshna kaba ha Bypass area, Mawkhanu (EKH).
Ha kawei pat ka jingjia ha ka 3 tarik mynta u bnai ha ka por kumba 3.50 baje janmiet, u Bah Nangiaipyndap Thabah u la pyntip sha ki pulit ba ki runar bym lah ban ithuh ki la prong hapoh ka ïing jong u kaba ha Shilliang Dongki, Sohïong (EKH) bad la tuh kawei ka mobile phone bad ka pisa kumba T. 85,000/-.
