Hukum ka ïing Bishar HC ban ai jingtip halor ka jingïaid ki trok kit marpoh khyndew hadien ka 21 tarik Iaiong

Shillong, Jymmang 6: Ka ïing Bishar High Court jongka jylla ha ka Sngi Balang, ka la shimkhia halor ka jingbym pat aiti ki bor ba dei khmih ïa ki jingtip halor ki sienjam kiba ki la shim halor ka hukum jingbthah ba shipor jong ka PIL kaba ïadei bad ka Custom bad Transport bad ka la ai por ïa ka Sorkar Jylla bad Sorkar Pdeng ba kin aiti ïa ka kaiphod.
Ka Division Bench jong ka Chief Justice Revati Mohite Dere bad u Justice HS Thangkhiew ka la pynpaw ïa kane haba shong bishar ïa ka PIL kaba la ujor da ka Registrar General, High Court of Meghalaya, pyrshah ïa ka Jylla Meghalaya bad kiwei kiwei.
Haba buddien halor ka hukum kaba la pynmih ha ka 28 tarik u Iaiong, 2026, u Dr N Mozika, DSGI, ula aiti ïa ka Affidavit jong u Rajarshi Chakraborty, Assistant Commissioner, Customs Department.
U Advocate General u A Kumar ula phah artylli ki Affidavit, kawei na ka bynta ka Tnad Forests and Environment bad kawei pat kadei na ka bynta ka Tnad Transport. Baroh ki Affidavit la pynrung ha ki jingthoh bad la pynpoi sha u ‘Amicus Curiae’ Bah Philemon Nongbri.
Halor ka jingbthah kaba shipor kaba la pynmih ha ka 21 tarik u Iaiong, 2026, ka Division Bench ka la pynpaw “Ngi la shem ba ym pat aiti ïa kino kino ki jingtip da ki bor ba dei khmih ha kaba ïadei bad kiei ki sienjam/ki kam kiba la leh da ki tnad kiba dei khmih”.
Haba kylli bniah halor kane, u Advocate General Kumar ula pan por shuh shuh ban ïoh aiti ïa ki jingtip ha ka rekod.
Ka ïing bishar ka la bthah ïa ka Land Custom Station ban aiti ïa ka kaiphod halor ka jingdon ki kali kiba ïaid lyngba ki Check Posts hadien ba la pynmih ïa katei ka jingbthah kaba shipor.
U Amicus Curiae Bah Nongbri ula pan por ban aiti ïa ka kaiphod hapoh ka shi taiew ban kdew ïa ki jingdkoh bad jingduna ha kaba ïadei bad kitei ki Affidavit.
“Katkum ka jingong ka jongu, ki la don ki jingduna ha ka rekod” la pynpaw ha ka hukum. Ka ïing bishar kala ai ïa ka por bad bthah ba ïa baroh ki kaiphod dei ban aiti ne phah sha ka Registry hapoh ka shi taiew bad ruh ban ai lypa ïa ki kot ki sla sha baroh ki kynhun kiba don bynta.
Ka Sorkar Jylla bad Sorkar Pdeng ki la ïoh por ar taiew ban aiti ïa ki kaiphod lyngba ki Affidavit, ryngkat bad ka jingai lypa ruh ïa ki kot ki sla sha u Amicus Curiae.ïa kane ka mukotduma la buh ban shong bishar biang ha ka 3 tarik u Jylliew 2026.