Puk yn shongshit ka elekshon MP shiteng samoi, pdiang u Dr. DRL Nonglait ïa jingtyrwa ka NPP

Shillong, Jymmang 06 : Ka National People’s Party (NPP) ha ka janmiet sngi Balang ka la ïoh pdiang ïa ka jubab na u Dr. DRL Nonglait uba la pyntip ba u long uba kloi ban pdiang ïa ka jingtyrwa jong ka party ban long u kyrtong ha kane ka elekshon MP shiteng samoi.
Kumban shu kdew hangne, ka NPP hapoh ka jingïalam jong u Bah Hamlet Dohling ha ka sngi Thohdieng ba la dep, ki la leit ban kyrpad bad khroh ïa utei u rangbah uba dei ruh u President jong ka Khasi Author’s Society ban ïakhun na ka party ha kane ka elekshon MP shiteng samoi kaba lah ban sa long noh shen ha kine ki khyndiat bnai.
Haba pyntikna ïa kane na ki nongïalam ka party, u Working President ka NPP, Bah Hamlet Dohling u la ong, “Ho-oid ka dei ka jingshisha ba i Dr. DRL Nonglait i la pdiang ïa ka jingtyrwa jong ka party ban long u kyrtong ha kane ka elekshon shiteng samoi.”
Na ka liang u Working President u la pynpaw ruh ïa ka jingsngewkmen halor katei ka rai ba u Dr. Nonglait u shim bad ong ba kane ka dei ka dak kaba bha ïa ka party na bynta kane ka elekshon MP kaban sa long.
Lah ban kdew hangne ba ki nongïalam ka NPP ha ka taiew ba la dep ki la ïathuh ba ki la don kumba san ne hynriew ngut ei ei ki riew donburom bad ki riewshemphang ba ki la jied ban tyrwa ban wan ïakhun na ka party ha ka elekshon MP shiteng samoi bad u Dr. DRL Nonglait u dei uba hakhmat eh ba ki buh.