New Delhi, Jymmang 02: Ka North Eastern Handicrafts and Handlooms Development Corporation (NEHHDC), ka CPSE hapoh ka tnat Development of North Eastern Region (MDoNER), mynta ka sngi ka la plié paidbah ïa ka Padma Doree, ka sienjam ba kyrpang kaba ïadei bad ka kam shna jaiñ kaba pynïasoh ïa ki kam shna jaiñ Eri (Ahimsa) jong ka thaiñ shatei lammihngi bad ka dustur thaiñ jaiñ Chanderi jong ka Madhya Pradesh.
Ïa kane ka sienjam la pyllait paidbah da u Secretary, MDoNER, u Sanjay Jaju, bad la bud ïa kane da ka jingpyni jain kaba itynnad kaba la pyni ïa ka jingpynïasoh lang ïa ka jain Eri silk – kaba pawnam na ka bynta ka jingpynmih kaba don jingbahkhlieh bad kaba ïaineh-ryngkat bad ki motif jong ki jain Chanderi.
Haba ai jingkren ha kane ka jingïalang, u Sanjay Jaju u la ong ba kadei ka jingthmu jong u Myntri Rangbahduh ka ri u Narendra Modi kaba la pynurlong ïa ka Padma Doree. U la ong ba hapoh ka jingïalam kaba shemphang jong u Myntri ka tnad Development of North Eastern Region u Jyotiraditya Scindia kane ka sienjam ba thymmai ka la urlong mynta ka sngi.
U la ong ba ka Padma Doree ka long kaba kyrpang namar ka wan na ki ar jait ki dustur kiba ïadei bad ka kam shna jain – Chanderi na Madhya Pradesh bad Eri Silk na ka thaiñ shatei lammihngi. U Jaju u la ong ba ka Padma Doree ka wanrah shakhmat ïa ki kam ba hiar pateng bad ruh ïa ka jingsaiñdur thymmai.
Ha kane ka sngi la don ka jingpyni ïa ki jaitjain bapher bapher, ha kaba ki briew ki la ïohi ïa ka jingïaid lynti ka kam shna jain bad ka jingïatreilang kaba la pynurlong ïa kane. Ha kaba ïadei bad ka kam shna jaiñ jong ka India, ki jingnang jingstad tynrai, bad ki kam kiba ïaineh, kane ka sienjam ka ban jur halor ka jingïahap jong ki kam tynrai ha ki iew kiba mynta ka por.
Kane ka jingpyni mar kaba lai sngi, kaba la sdang mynta ka sngi, kadei kaba la pynkhreh kum ka rynsan kaba don ki jingïamir jingmut bad kaba kylla katkum ka jingdonkam, kaba plié lad ïa ki briew kiba wan ïashim bynta ha kane ka prokram ba kin ïakren bad ki nongsaiñdur, sngewthuh ïa ka kam, bad ïohi ïa ka jingpynkylla ïa ki ksai sha ki jaiñ.
Ki nongsaiñ dur na ka thaiñ shatei lammihngi bad Madhya Pradesh ki ïashim bynta ha kane ka prokram ha kaba ki pyni dalade ïa ki kam bad ki batai shaphang ki kam shna jaiñ tynrai. Ha kane ka prokram la don ruh ki bynta kiba ïadei bad ki jait bam kiba pyni ïa ka jingïar jong ka dustur ha kine ki thaiñ kiba ïashim bynta.
Ha kaba ai jingkren ha ka prokram, u NEHHDC Managing Director Mara Kocho u la ong, “Ka Padma Doree ka pynïasoh ïa ki kam shna jaiñ jong ka thaiñ shatei lammihngi bad ka dustur shna jain Chanderi, kaba pynbiang ïa ka jinglong jingman kaba don ka jingïasoh bad kaba ïaineh ha ki kam shna jaiñ.”
Ha kane ka sngi la wan ïashim bynta da u Director ha ka kam shna phlim u Muzaffar Ali, ki ophisar ka Tnat DoNER, ki ophisar na ka Madhya Pradesh Handloom ha ryngkat ki kynrem ki lyndan bad ki nongsaindur kiba don bynta bad kane ka sienjam.
