Shillong, Jymmang 4 : Ka Meghashree Roy jong ka St.Mary’s Higher Secondary School, Shillong, kaba ïoh ïa ka kyrdan ba nyngkong ha ka arts stream ha ka eksam HSSLC 2026, ka la ong ba ka “kyndit bad sngewkmen ruh ha kajuh ka por” hadien ba ka jingpynbna result ka MBOSE ha ka sngi Nyngkong.
“Nga da kyndit shisha bad nga sngew kmen ruh namar ngam ju khmih lynti ïalade ba ngan ïoh ïa ka khyrdan ba nyngkong hynrei nga la kmen shisha” ong ka Roy kaba ïoh haduh 457 mark ban ïoh ïa ka kyrdan ba nyngkong.
Halor ki buit pynkhreh jong ka, ka Roy ka la ïathuh ki external reference book ne ki kot jingtip ba nabar ba lah ban khmih lang, kim long satia kiba donkam.
“Phim donkam ïa ki tyllong jingtip ba nabar lane kiwei ki kot. Ka shu long ba phi hap ban pule bha ïa ki kot bala ai da ki skul” kala ong.
Haba kylli, ka la bynrap “Nga tharai nga la pynkhreh bha. Ka long kaba suk bha ïa nga, watla ki don katto katne ki jingkylli kiba eh ha ki katto katne ki sobjek. Hynrei baroh hi ka dei ka eksam kaba suk. Lada phi pule, phin lah ban ïoh bun ki marks”.
Ka Roy ka don jingthmu ban pule ïa ka political science hadien ba ka pass ïa ka CUET. “Nga thmu ban pass ïa ka CUET bad leit sha ka University ban pule Political Science bad khatduh ngan ïakhun ia ka eksam civil service” ka la ong “Nga kwah ban long ka ophisar civil service. Nga ju peit bha ïa ki interview UPSC bad nga la pynkreh ïa ka UPSC general knowledge quiz namar ka long kaba kongsan ïa nga na ka bynta ban pynkhreh ïa ka CUET”.
Ka Principal ka St. Mary’s Higher Secondary School, Sonai Chacko, ka ong ba ka result ka pyni ïa ka jinglong jong ka skul. “Ka jingjop ka dei ka jingmih na ka jingïai leh bha, jingtrei shitom, jingtista bad jingkut jingmut kaba khlaiñ jong ki nonghikai bad ki samla pule jong ngi” ong ka Chacko.
