Kdur khyllem ka TMC ha West Bengal, pynkyndit ka seng thymmai u tyngshop Vijay ha Tamil Nadu

Shillong, Jymmang 04 : Ka jingñiew vote na bynta ka elekshon MLA ha kane ka sngi Nyngkong na bynta san tylli ki jylla jong ka Ri, ka la long kaba kham phylla khamtam haba bun ki party watla ki long kiba khlainbor hynrei khlem poi pyrkhat ki mad ïa ka jingjop bad kumjuh ïa ka jingshah rem.
Napdeng kine baroh ka jingñiew vote kaba kham shongshit eh dei ha West Bengal namar na ki 240 tylli ki constituency, ka BJP ka la ïoh ban jop haduh kumba 208 tylli da kaba ïoh ban knieh noh ïa ka bor jong ka AITC kaba ju ïalam ïa ka sorkar ha katei ka jylla la bun snem bha hapoh ka jingïalam jong ka Mamata Banerjee kum ka Myntri Rangbah.
Tad haduh ba thoh ïa kane ka khubor, ka AITC watla ka bat ïa ka bor synshar hynrei kam shym lah shuh ban khie khlieh bad jop tang kumba 79 tylli ki constituency. Da kane ka jingjop ka BJP da kaba suk ka la ïoh ban thaw ïa ka sorkar tang nalade hi.
Tamil Nadu : Kane ruh kadei ka jylla kaba la pynkyndit lut ïa ka ri India baroh kawei namar khlem poi pyrkhat ka party Tamilaga Vettri Kazhagam (TVK) ba ïalam da u aktor ba pawnam u Chandrasekaran Joseph Vijay ka la sar naphang haduh 107 seat na ki 234 tylli ki constituency. Kiwei pat ki party kiba bud ki kynthup ïa ka DMK kaba ïoh 60 seat bad ka AIADMK ka ïoh 47 seat.
Assam : Ha ka jylla Assam pat hapoh ka jingïalam jong u Himanta Biswa Sarma ka BJP ka la jop suk haduh 82 tylli ki constituency na ki 126 tylli ki constituency. Hadien ka BJP bud pat sa ka Congress kaba jop tang 19 seat, ka Bodoland Peoples Front bad kaAsom Gana Parishad kiba jop mar 10 seat nalor kiwei kiwei.
Kerala : Ha kane ka jylla pat la sakhi ba ka Indian National Congress ka la ïoh ban jop haduh 63 seat na ki 140 tylli ki constituency. Kiwei pat ki party ki kynthup ïa ka Communist Party of India (Marxist) – CPI(M) kaba jop 26 seat, ka Indian Union Muslim League kaba jop 22 seat, ka Communist Party of India kaba jop 8 seat bad ka Kerala Congress kaba jop 7 seat.
Puducherry : Ha ka jigniew vote ha ka jylla Puducherry pat ka All India N.R. Congress (AINRC) ka la jop haduh 12 seat na ki 30 tylli ki constituency. Kiwei pat kiba jop ki kynthup ïa ka
Dravida Munnetra Kazhagam (DMK) kaba jop san seat, ka Bharatiya Janata Party kaba jop 4 seat bad ka Tamilaga Vettri Kazhagam (TVK) kaba jop ar seat.