Mawkyrwat, Jymmang 03 : Ka la long ka sngi kaba dap da ka jingkmen ïa ki paidbah ka South West Khasi Hills District baroh kawei, ha kaba u Symbud Myntri Rangbah ka Jylla Meghalaya, u Bah Prestone Tynsong, uba long ruh u State President ka National People’s Party (NPP), u la pynbna paidbah ba shen kin sa urlong ki jingangnud jong ki paidbah lyngba ki kam pynroi bapher bapher hapoh ka distrik.
Haba kren ha ka jingïalang paidbah, u Bah Prestone Tynsong ula ong ba ka sorkar MDA–II ka trei shitom ban pyndep ïa ki jingkular kiba la dep ban buh, bad ka jingïatreilang bad ka jingkyrshan jong ki paidbah kan wanrah ïa ka roi ka par hapoh ka Jylla baroh kawei. “Shen yn sdang ïa ka jingtei ïa ka surok na Weiloi sha Rangthong ha ka Phase–I ha ka jingmang pisa kaba T. 140/- klur tyngka, ka ban sa long ka jingkyrkhu kaba khraw ïa ki nongleit nongwan bad ban pynsuk ïa ka jingïaid jingïeng jong ki paidbah.
Shuh shuh, ula ong ba ym tang katta, hynrei ynsa bteng ruh ïa ka Phase–II kaba dei na Rangthong sha Ranikor ha ka jingmang pisa kaba T. 200/- klur, kaba long bynta jong ka jingïohi jngai ban pynbha ïa ka jingïadei hapdeng ki thaiñ bapher bapher.
Nalor kata, haba kren halor ki kam pynroi ba ïadei bad ki ophis treikam, u Bah Prestone u la pynbna ba shen ka South West Khasi Hills District kan sa ïoh sa kawei pat ka C&RD Block thymmai, kaba yn ïarap ban pynjan ïa ki paidbah bad ki jingshakri jong ka sorkar.
Ïa kine ki jingpynbna ula pynsngew paidbah ha ka jingïalang kaba la long ha madan jong ka Nativity Mawkyrwat, South West Khasi Hills District ha kaba la pynlong ruh ban pdiang burom ïa ki nongkyrshan kiba wan ban pynïasoh sha ka NPP Mawkyrwat Block na kiwei pat ki seng saiñ pyrthei.
