Kumba long kiba la heh la san, ki khynnah ruh ki donkam ka jingïohthiah bha bad ïohthiah pura na ka bynta ka jinglah ban treikam bha ka bor met bad bor jabieng. Ka jingïohthiah bha ka pynthikna halor ka jinglah ban leh kiba bun jait ki kam ha ka sngi kaba bud. Naduh ki jingdonkam ba dawa ha ki skul haduh ka jingdon bynta ha ka jingïalehkai para khynnah. Ban lah bor halor ka jingleh kiba bun ki kam na ka bynta baroh shisngi lynter ki khynnah ki dawa bun bha ka bor. Ka jingïohthiah bha ka dei kaba lah ban ai jingïarap halor ka jingshalan bor. Hynrei ki don pat napdeng ki katto katne ki khynnah kiba shem jingeh halor ka jinglah ban ïohthiah bha. Ban khanglad halor ka jingshah ktah ba mih na ka jingduna thiah ka long kaba donkam ban pynthikna ba ki khynnah ki ïohthiah bha bad ïohthiah pura.
KI KATTO KATNE KI LYNTI BA KI KMIE KI KPA KI LAH BAN LEH NA KA BYNTA KA JINGÏOHTHIAH BHA KI KHUN JONG KI :
PYNDUNA BAD TEHLAKAM HALOR KA JINGKHMIH ÏA KI SCREEN : Kiba bun ki khynnah ki dei kiba la kylla mlien ban khmih ïa ki phone bad kiwei de ki jingkhmih ba paw lyngba ki screen. Ki don napdeng ki katto katne kiba la kyrni halor kine kiba ym nang ruh ban leit thiah khlem da khmih shipor ïa ki. Ka jingkhmih palat kine ki screen ka dei kaba wallam ka jinglong mlien bad kyrni bad ktah pat halor ka jingïohthiah bha jong ki khynnah. Ha kajuh ka por ruh ki ktah ïa ki khmat jong ki khyllung khynnah.
KA JINGBUH POR : Ka jingbuh por manla ka sngi ka dei ka lynti kaba kynsai tam ba ki khynnah kin thiah ha ka por kaba dei manla ka sngi. Lada phi buh ka por ban leit thiah bad ka por khie mynstep, ki khun jongphi kin kylla mlien ban bud ïa kane. Buh bad mang ïa ka por bad pynthikan ba ki khun kin leit thiah ha katei ka por ba phi buh. Kumjuh ruh kyrsie thiah ïa ki katkum ka por ba phi la mang. Kane kan ïarap ban wallam ka jinglong mlien ha ki bad ïarap ïa ki khun ba kin ïohthiah bha.
KA JINGAI KI JINGBAM BA TEI : Ki jingbam ba ki bam ruh ka don bynta bad ka jingpaw halor ka jingïohthiah jong ki khynnah. Kiar ban ai ki jingbam ba la sdieh tyrkhong bha bad ki jingbam kai ha baroh shisngi lynter khamtam hashuwa ka por thiah. Pynthikna ruh ba phi kiar na ka jingai caffeine ïa ki khynnah ha kano kano ka dur jong ka jingbam ne ka jingdih. Pyrshang ban ai bam kham bun ki jhur bad ki soh ban kyntiew halor ka koit ka khiah bad ka heh ka san jong ki.
KA JINGLONG SUK : Haba ki khynnah ki pyrshang ban thiah pynthikna ba i don hapdeng ka jinglong suk. Khmih halor ka jingbuh ïa ka syngkhlieh bad ka jingkup ïa ka nep. Ki khynnah ki ju sngewtynnad ban sngap ïa ki khana. Jied ki jingïathuh khana bad ïathuh khana ha ki ban aibor halor ka jingïohthiah bha jong ki khun.
KA JINGPYNSHLUR BAN DON BYNTA HA KA JINGKILAN MET: Ka jingkilan met ka long kaba donkam bad kongsan na ka bynta ki khynnah bad kumjuh ruh ïa kiba la heh la san. Phi donkam ban pynshlur ïa ki khun jongphi ban lehkai shabar. Katba nangjur ka jingdon bynta ha k jingpynkhih ïa ka met ka phad katta ruh ka nanglah ban ai jingmyntoi ha ka liang ka koit ka khiah jong ki. Ka pyllait na ka jingma jong ki khynnah halor ka jingsngaid palat bad kiwei de ki jingpang. Ha kajuh ka por ruh ka kyntiew halor ka jinglah ban treikam bha ka bor jabieng.
