Jowai, Ïaïong 30: Ka Ophis jong u Deputy Commissioner ka West Jaiñtia Hills mynta ka sngi 30 tarik u ïaïong kala pynlong ïa ka ‘Admission and Job Fair 2026’, ha ka jingïalang bala long ha District Library Auditorium Mynthong Jowai.
Ha kane ka sngi la wan ban ai jingbatia sha ki samla pule da ki riew shemphang ha ryngkat ka jingïatreilang bad ka Admission Abroad, Admission India bad ka Bold Move.
Ka thong jong kane ka prokram ka long shi bynta ban ai jingtip ba kham bniah sha ki samla pule ka District ba kin tip kumno ban bteng ïa ki jingpule kiba kham shalor katkum ka bor bad ka jinglah jong ki lyngba ki lait pule bapher bapher.
Ha kaba daki spah nguh ki samla pule kila poi sha kane ka jingïalang ban ïa kynduh markhmat bad ban ïoh phylliew jingmut lang bad ki nongpynmihkhmat na ki Institute bapher bapher halor ka rukom pynrung kyrteng naka bynta ka jingmyntoi bad lawei haka pule ka puthi jong ki.
