Jowai, Ïaïong 30: Ka Ophis jong u District Sports Officer (DSO), East Jaiñtia Hills ha ryngkat ka jingïatreilang bad ka East Jaiñtia District Sports Association (EJHDSA) hynnin ka sngi 29 tarik kala sdang ïaka District District Level Inter School Athletic Meet-2026 kaba lai sngi lynter ha madan Teilang, Dkhiah West, East Jaiñtia Hills District.
Ïa kane ka lympung la wan ban plie pyrda da u District School Education Officer (DSEO) ka East Jaiñtia Hills District ka bah R. Diengdoh haka jingïadon lang ka District Sports Officer (DSO) kong Stephanie M Rapsang, ki nongpynïaid skul, ki nonghikai, ki khynnah skul bad kiwei kiwei.
Haba ai jingkren u bah R. Diengdoh ula pynpaw ïa ka jingdonkam jong ka jingïaleh bad ka jingtrei shitom, u la pynkynmaw ruh ïa ki samla pule ban don ka mynsiem ïalehkai bad ban don ka burom ka akor bad ka jingminot na ka bynta ka lawei.
Ha ka sngi nyngkong la pynlong ïa ki jingïalehkai ha ki kyrdan bapher bapher kata haka Under-18 Girls Long Jump, Under-16 Boys Shot Put, Under-18 Boys High Jump, ka Javelin Throw haka kyrdan Under-16 Girls bad Under-18 Girls nalor kiwei de ha kaba la sam ruh ïa ki khusnam sha ki nongjop.
La pyntip baroh ki skul kiba la wan ban ïashim bynta haka District Level Inter School Athletics Meet mynta u snem kila don palat 30 tylli ki skul, naka bynta ki jingïakop bapher bapher ki dang ïaid shaid shaid mynta tad haduh ka sngi Thohdieng 1 tarik u Jymmang kaba dei ka sngi pynhap pyrda.
