Shillong, Iaiong 28 : Ka Sorkar Jylla ka la buh thong ban pyndep ïa ka surok Shillong-Dawki project hapoh u snem 2027 kumba la buh bad ka la bthah ban peitngor baroh arphew sawkynta bad ban ïaid survey ha ki jaka kiba idon jingma khnang ban ïada ïa ka jingduh ki mynsiem briew na ki jingtwa kyndew bad hap maw.
Haba kren sha ki lad pathai khubor ha ka sngi ba-ar, u Symbud Myntri Rangbah ba khmih ïa ka Tnad PWD (Roads) u Bah Prestone Tynsong ula ong “Na ka liang ka Sorkar, ai ba ngan kular biang ïa ki paidbah ba ngi kwah ban pyndep ïa kane ka project kham kloi kat katba lah bad ngi kwah ruh ban kyrpad ïa baroh ki nongshong shnong ka thaiñ, kiba shah ktah ba kin sngewbha ban ïai shah lem namar ngi kwah eh ban pynthikna ban ngin pyndep ïa ka project kham kloi kat katba lah”.
“ïa mynta, ka thong bala buh ban pyndep ïa kane ka project ka dei haduh u snem 2027 bad nga thikna ba ngin lah ban pyndep ïa ki jingshna pynheh ïa ka surok sha ka 2-lane” ula bynrap.
U Bah Prestone ula ong ba ka jinglong riat jong ka jaka kala buh ha ka jingeh ban shna ïa ka surok namar ka jingtwa khyndew man ka por khamtam ha ka por slap.
“Phi la ïohi hi ba ka jinglong jong kane ka surok na Shillong sha Dawki ka dei kaba rit bad wat ka jaka ruh ka khim bha. Lada phi kren ïa ka liang ka mon, phin ïohi ïa ka jaka ban pynheh surok ka long kaba rit bha bad lada phi kren ïa ka bynta sha ka diang, ka dei ka riat ka ram suda” ula ong.
U ong ba ka Sorkar ka la bthah ia ka NHIDCL, ka Tnad PWD bad ki bor Distrct ba kin shim ïa ki lad jingïada na ka bynta ka jingshngaiñ.
Ha kajuh ka por u Symbud Myntri Rangbah ula kyntu ïa ki nongshong shnong ka thaiñ ba kin kiar ïa ka leit ka wan ki bym da donkam eh, na kane ka surok ha ka por slap.
“Nga kwah ban kyrpad ïa baroh ki nongshong shnong ka Pynursla haduh Dawki ba kin sngewbha ban kiar ïa ka leit ka wan ki bym da donkam eh, na Dawki sha Shillong lane na Shillong sha Dawki lyngba kane ka surok ha ka por slap lait noh tang ki khep ki bym lah kiar” ula ong.
