Nongstoiñ, Ïaiong 27: Ka shongkha khlem pat dei por ka dang kynrei bha ha kine ki sngi ha West Khasi Hills khamtam ha ki nongkyndong kynshrot jong kane ka District, kat haduh ba ka la buh jingeh haduh katta katta ïa ki ïa ki kmie ki kpa, ïing ki sem, ïa ki shnong ki thaw bad wat ïa ki kynhun balang.
Halor katei ka mat la ïoh ban ïakren bad kiba bun ki riew rangbah kiba la pynpaw ka jingsngewkhia bad kubur ruh ba kane ka dei ka tynrai jong ka jingpait jingpra bad ka jingmih ki jait jingsniew kaba wanrah shibun ka jingeh ha kiba bun ki longïing longsem.
U Bah John Dkhar na thaiñ Maweit u la ong ba watla ka sorkar ka ong ba ka karta ban shongkha jong ka kynthei ban shongkha ka long 18 snem bad ka karta u shynrang ka long 21. Hynrei, imat katkum ka jingïaid jong ka por la donkam ban nang pynheh shuh shuh ïa ka karta, khnang ban ïada na ka jingpait jingpra ha ki ïing ki sem. U la ong ba lada peit ha kine ki sngi wat kito kiba la biang ka karta shongkha katkum ka aiñ ruh, hynrei imat ka jabieng ka dang lung palat ban jam sha kane ka sien jam.
U la ong ba kawei na ki daw ha kiba bun ki nongkyndong, ka long ba kito kiba dang rit ka karta lei lei, kiba tang ban long samla bha lane ban sngewthuh ïa kata ka kam shong kurim ruh kim pat sngewthuh, hynrei ki lah da ïoh khun noh shwa. Kaba mut ba na ka jinglong khynnah sha ka jinglong tymmen beit khlem pat da long samla.
Kumta ynda ki la ïoh khun iwei ar, ka bor pyrkhat ban long tymmen kam pat kot bha, ki la sdang phai sha ka pyrthei ban ïohi ba ka por ka dang biang ban leh samla bad kum kita kiei kiei ki daw, kiba sa pynlong ïa ka jingjot jingpra noh ki ïing ki sem, lait noh kito kiba skhem ka nongrim naduh ki kmie ki kpa.
U la ong ruh ba kam long kaba phylla ïa kane khamtam kito kiba dang hapoh ka karta kaba aiñ kam pat shah ban shongkha, namar wat ki Nongsharai Balang hapoh West Khasi Hills District, ki ong ba kim lah ban len ïa ka jingshisha ba katei ka jingshongkha khlem pat dei por ka dang kynrei ha ha kine ki sngi khamtam eh ha ki nongkyndong. Ki la ong ruh ba ka jingeh ba ki ïakynduh haba don kiba kum kitei ki nongshong shnong kiba shongkha khlem dei por, ka long ba lada pyndep ïa ka jingïathoh shong kurim ruh ka aiñ ka la khang pyrshah.
Nalorkata ki la ong ruh ba kawei pat ka jingeh ka long ynda ki la ïoh khun, ki Pastor ki hap ban pynbaptis ïa ki khun jong ki bad ki hap ban pynbiang ïa ki syrnod sngi kha jong ki khunlung. Haba ki leit ban pynbit pynbiang ha ki bor ka aiñ ki Pastor ne rangbah balang kiba pyndep ïa katei ka jingpynbaptis, ki shem jingeh haduh katta katta. Ym tang katta wat ki kmie kim kpa ruh ki shem jingeh ban pynsngewthuh lada ki khun kim kohnguh haba ki sneng ki kyntu ïa ki.
Ban teh lakam ïa kaba kum katei ka jingeh ka dei tang lada ki kmie ki kpa jong baroh ki longïing longsem ha man la ki shnong ki thaw, ki don ka jingïatreilang ryngkat bad ki Rangbah shnong, ki Pastor, ki ASHA, ryngkat bad ki bor sorkar lehse lah ban pynduna ïa ka jingshongkha khlem dei por.
Ym lah ban len ruh ba ka jingshongkha khlem pat dei por ka dei ka daw jong ka jingjyllei ki khun khlem kpa kaba pynlong ruh ïa kito ki longkmie ba ri khun rei ba kin ym ïoh lad ban pyndap pynbiang ïa ki khun jong ki bad ynda ki la kynjoh ha ki 10 snem sha neng ki kylla long ki khynnah kiba shang makia kylleng ki jaka. Nalorkata na ka jingbym biang ha ïing ha sem ki poi sha kiba bun ki kam sniew, tang namar ka jingshah ïalam bakla ba bun jait wat haduh ban poi ha ka tuh ka thiem ruh.
