Na Shillong lap ïa ka samla bajah rngai na Guwahati hadien ba shah pynsma dawai ha ki runar

Shillong, Iaiong 25: Kawei ka samla kaba 27 snem ka rta kaba dei na Guwahati kaba la jah rngai naduh hynnin ka sngi ka 24 tarik u Iaiong, la lap ïa ka ha ka sngi Saitjain na Polo hangne ha ka nongbah Shillong.
Kane ka samla kaba kyrteng ka Bhabana Sarma, ka dei ka ba la lap ba ka shong ang lyngngoh hajan kawei ka dukan die waidong ha Polo. Mar ïa ïohi ïa ki pulit kynthei kiba pynïaid kali ka la shu bat beit ïa ki bad kumta ki la ïalam ïa ka sha Sadar Police Station.
Ka Sarma ka trei kum ka nonghikai ha kawei ka skul shimet ha Guwahati bad dang shen ka la iehnoh ïa katei ka kam. Ka la phla ba hynnin ka sngi ki don ki runar kiba kam ithuh kiba la pynsma ïa ka da ki kynja dawai bad hadien kata ki la ai ïa ka da ki jingbam thiang kat haduh ba kam tip briew shuh bad kam tip hi ruh kumno ka wan poi shane sha Shillong. La iathuh ba ka mobile jongka ka dang don bad ka tangba ia ka sim card la don ba sei noh. Ka ATM Card jongka ka la jah hynrei ki jingdeng ha kti jongka pat ki dang don.
“Ka kynhun pulit na Guwahati ki la wan poi sha Shillong ban rah noh ïa ka.Ngi dang tohkit kumno ka wan poi sha Shillong, ha ka 24 tarik u Iaiong, ka la mih na la ïing bad ha kaba nyngkong ka la shim ïa ka taksi Uber hynrei ka la pynsangeh noh. Hadien ka la leit sha Paltan Bazar da kaba bat ïa ka Rapido. ïa ka case la sdang ban tohkit bad ngin dang bishar bniah ha baroh ki liang,” la ong u wei u pulit ophisar.
U la bynrap, “Shwa ban mih na ïing, ka la ïathuh ha kiba haïing hasem ba ka leit sha skul jong ka ban shim ïa ka tulop kaba dang sahteng.”
Ka Sarma ka la jah rngai ha ka sngi Thohdieng hadien ba la kynnoh ba ka la phah khubor sha kiba ha ïing jong ka bad pynpaw ba ka don hapdeng ka jingma.
La ïathuh ba ka la mih na ka jaka sah jong ka ha Tetelia bad ka dang don ha lynti ban leit sha Azara ha ka por ba ka phah ïa ka khubor ba ka don hapdeng ka jingma, kumta ki bahaïing jong ka ki la ujor ejahar ha Jalukbari Police Station, hadien kane ki pulit ki la pynlong ïa ka jingkhynra ban lap ïa ka leit ka wan jong ka.
Katkum ki tyllong khubor, la ïathuh ba ïa ka jaka ba khatduh ba la tip lyngba ka mobile jong ka, la lap hajan ka thaiñ jong ka Gauhati University shwa ba ka phone jongka,kan long ym lah ban ïoh ne Unreachable. Hadien kane ym shym la ïoh jingtip shuh tad haduh ba la lap ïa ka ha Shillong.
Ha kajuh ka por, ki pulit ki la sdang ïa ka jingtohkit halor ki jingjia kiba don ha katei ka kam.
“Mynta ngi dang eksamin ïa baroh ki liang. La pyntip sha ngi ba ka jinglong jingman jong ka koit ka khiah ka long kaba biang.Kumno kala poi sha Shillong na Guwahati ka dang don ha ka jingtohkit, kiba ha ïing jong ka ruh ki la wan sha Shillong ban wan ïalam biang ïa ka”, la bynrap shuh shuh une u ophisar.