Ba thmu pynneh pynsah ïa ki khlaw ki btap, pynbna law adong ka sorkar ïa ka khlaw ha EGHD

Shillong, Ïaïong 25: Ka sorkar Meghalaya ka la pynbna ïa kawei ka khlaw shnong kaba thymmai kum ka Law Adong kaba don ha East Garo Hills district, ha kaba kane ka la pynlong ïa ka sorkar ban ïada ïa ka jingrben jong ka khlaw lyngba ka jingïatreilang bad ki bor pynïaid shnong.
Katkum ka jingpynbna ba la pynmih da ka tnat Forest and Environment ka la pynthikna ba ïa ka Bijasik Matwa A’pal Community Forest, kaba don bad hap hapoh ka Songsak block, la ithuh kum ka “Bijasik Matwa A’pal Community Reserve” bad kane ka la treikam noh mardor hapoh ki kyndon jong ka Wildlife (Protection) Act, 1972.
Ka jingheh jong kane ka jaka ka long malu mala kumba 20.89 hectare. Ka jingpynbna ka la pynpaw ruh ïa ki jingai dak kiba bniah halor u pud u sam kane ka khlaw ban pynneh bad tyngkai kaba don kylleng ka bynta ba shatei, sha mihngi, shathie bad kaba sha sepngi, bad ka kdew ruh ïa ka jingdon ki wah duid, ki jaka rep bad ki jaka ki shnong bad kiwei ki bynta.
Katkum ka kyrwoh la ong ba kane kadei ka jingthmu ban pynkhlaiñ ïa ka jingdonkam ban pynneh pynsah bad tyngkai ïa ki jaka kiba don sawdong ki shnong ki thaw bad kumjuh ruh ban sumar ïa ki tyllong jong ki khlaw ki btap. Ka jingpynneh ïa kine ki khlaw shnong ki long lyngba ki jingïatreilang ki nongshong shnong kiba long ruh ka jingdonkam ban kyntiew ïa ka ïoh ka kot bad kiwei ki jingdonkam.
Ka sorkar ka la thaw ruh ïa ka management committee na ka bynta kane ka jingthmu. Kane ka committee yn khlieh da chairman bad kynthup ïa ki nongmihkhmat na ki shnong ha ryngkat bad ki ophisar napoh ka Forest Department. U ne ka Divisional Forest Officer of East and West Garo Hills (Wildlife Division), ne nominated officer, kin long ki member secretary.