Sam jingïarap u Myntri ka tnad kam rep sha kiba don jingduna dkhot met bad ki riew tymmen

Shillong, Iaiong 25 : U Myntri ka tnad kam rep kam riang ka jylla u Timothy D Shira ha ka Sngi Thohdieng u la sam ki jingïarap da ki tiar sha ki 584 ngut ki nongïoh jingmyntoi kiba kynthup ïa kito kiba don jingduna ha ki dkhot met bad ki riew tymmen na ki jaka bapher bapher jongka North Garo Hills District.
ïa kane ka jingsam jingïarap la pynlong da ka Indian Oil Corporation Limited (IOCL) na ka Corporate Social Responsibility (CSR) fund jongka ha ka jingïatrei lang bad ka District Social Welfare Office. North Garo Hills. Ka jingthmu ka long ban kyrshan ïa kito kiba don ka jingduna ha ki dkhot met bad kumjuh ruh ki riew tymmen. Ka jingïarap ka long da ki tiar ba kin suk ban ïaid ban ïeng laitluid bad ban im ka jingim kaba bit ba biang.
Haba kren ha katei ka jingïalang u Shira u la ai ka jingïaroh ïa ka IOCL kaba la ïarap lyngba ka CSR jongka ïa ki briew kiba don jingduna dkhot met bad ïa ki riew tymmen da ki tiar ki tar. U la ai ruh ka jingïaroh ïa ki bor synshar district bad kumjuh ruh ïa ka DSWO kaba la ïaid kylleng ban wad bniah kino kiba dei hok ban ïoh jingmyntoi.
U Myntri u kyrmen ba kane ka jingsdang ïa kane ka prokram kan dang ïai btneng nangne shakhmat ruh ban ïarap ïa ki riew tymmen bad ki briew kiba don jingduna dkhot met ba ki lah ban ïeng ban ïaid khlem kano kano ka jingteh jingkhum.
U ai khublei ruh ïa ka Artificial Limbs Manufacturing Corporation of India (ALIMCO) kaba la shna bad pynmih ïa kine ki tiar ba kito kiba donkam ïa ki kin ïoh ban pyndonkam hok ïa ki ym tang ha kane ka jylla hynrei ha kylleng ka ri India.
Lah ban kdew ba ka ALIMCO ka dei ka tnad ba peit da ka sorkar pdeng ban peit bad pynmih ïa kine ki Artificial Limbs kaba la ïarap bha ïa kiba bun ki briew kiba donkam ïa ki. Kane ka tnad ka shna ruh ïa ym tang ïa ki tiar na ka bynta kiba kheiñ ba kdiah, hynrei na ka bynta ban ïohi bad ïoh sngew ruh. Haba kren ha kane ka jingïalang u Deputy Commissioner u D Abishek Saini u la pynpaw ïa ka jingshim khia jongka sorkar ban ïarap ïa kine ki shem lanot ha ka jingim jongki.
U la kyntu ïa ka DSWO ba kan ïai bteng ïa kane ka kam ba baroh kiba donkam ïa kine ki jingïarap kin ïoh ïa kine ki tiar. Haba kren pat ha ka jingïalang ka Chief Maneger ka IOCL ka Malati Malakar ka la ong ba ka IOCL ym tang ba ka pyndap petrol ïa ki kali bad da ki lyer shet jingshet ne ki LPG ha ki ïing ki sem hynrei ka noh synniang ruh na ka bynta ka bha ka miat jong ki briew. Ka la ong ba kane ka jingïarap da ki tiar sha kine ki briew kiba donkam ïa ki ka long tang kum ka jingleh bha ba rit ïa kine ki briew kiba shakri ha ka imlang ka sahlang da ki snem lynter wat hapdeng ka jingduna ki dkhot met jongki.