Itanagar, Ïaiong 25 : U President jong ka Arunachal Pradesh u Pema Khandu ha ka sngi Saitjain u la ong ba ki 19 tylli ki distrik jong ka jylla ki la lait phar mynta na ka jingpang malaria, hynrei la katta pat u dang khot u wer ïa ki paidbah ba kin ïa trei lang khnang ba yn lah ban pynduh jait syndon ïa kane ka jingpang ha ka jylla shwa u snem 2030.
Haba kren ha ka jingïalang rakhe ïa ka World Malaria Day, u Myntri Rangbah u la ong ba ka jingpynduh jait ïa kane ka jingpang ka donkam ïa ka jingïatrei lang jong baroh ki nongshong shnong ka jylla bad kumta u ong ba ki dei ban shim ïa ka sienjam kaba suk tam, kata tang ban ïa snohkti lang ha kane ka jingïakhun.
“Kane ka sngi ka pynkynmaw ïangi ïa ka soskular ba ngin ïatrei lang ban pynduh jait ïa ka jingpang malaria bad ruh ban pyntikna ïa ka lawei kaba koit ba khiah,” u la ong.
Ha kajuh ka por u la ong ruh ba ka Arunachal Pradesh ka la kiew bha ha ka jingïakhun ïa ka malaria bad don mynta kum kawei na ki jylla kaba hiar bha ha ka jingdon kiba ïoh malaria. “Haduh 19 tylli ki distrik ki la lait na ka jingpang malaria bad kane hi ka pynpaw ïa ka jingtrei borbah jong ki nongtrei ka koit ka khiah jongngi ha ka imlang sahlang.,” u la ong.
Tangba, u la ong pat ba ka thma ban ïakhun pyrshah ïa kane ka jingpang kam dei satia kaba suk naba ki dang hap ban ïakhun bun kiei kiei haduh ban da poi sha ka thong.
“Ngi don ka thong ban pynlong ïa ka Arunachal Pradesh kum ka jylla kaba lait luid na ka jingpang malaria ha u snem 2030,” u la ong, da kaba kyntu ïa ki briew ban pyndonkam beit ïa ki musari ïada kiba neh slem, ban pynduh lut ïa ki kynja nala ba lang um, ban phong ïa ki jaiñ ïada ha ka por ba ki khniang ki bun, ban pyndonkam ïa ki dawai pynïap khniang hapoh ïing, bad ban wad ïa ki jingtest mardor ha ki khep ba don ka jingshit.
“Ryngkat, lyngba ka jingpynsngewthuh bad ka jingtreikam lang, ngin tei ïa ka Arunachal Pradesh kaba khlain bad kaba lait na ka jingpang malaria,” u la ong.
