Hukum ka ïingbishar High Court : Kynthuplang hajuh ïa ki 3 tylli ki ejahar pyrshah ïa u MDC barim namar ka jingthoh pynshit jaidbynriew ha FB
Shillong, Iaiong 24 : Ka ïing Bishar High Court jongka jylla ka la bthah ban kynthup lang hajuh ïa ki lai tylli ki ejahar ba la register pyrshah ïa u MDC barim Sofior Rahman halor ka jingthoh pynshit jaidbynriew jong u ha Facebook, haba pynpaw ba ym lah ban pynlong ïa bun ki jingtohkit halor kajuh ka kam.
Ha ka hukum ba pynmih ha ka sngi Palei (23 Iaiong), ka ïing Bishar ba la khlieh da ka Chief Justice Revati Mohite Dere, ka la pynwai noh ïa ka ujor bala muduid ïa u Rahman ba kyrpad ban sei madan ïa baroh ki ejahar pyrshah ïa u bad ban kynthup lang hajuh ïa ki case bala mudui ha ki Police Station bapher bapher hapoh ka Jylla.
“La hukum ban pyntreikam mardor ïa kine ki kyndon bad ïa kane ka jingmudui la pynwai noh” hukum ka ïing Bishar.
Kat kum ka hukum, u Rahman, ïa uba la ñiew kum u nongïalam ka thaiñ bad MDC barim, ula “pynsawa ïa ka sur na ka bynta ki jaidbynriew bar jylla ha kiba bun ki khep na ka bynta ka jingïashim bynta ki jaidbynriew bar jylla ha ka elekshon GHADC 2026 lyngba ki rynsan social media kata ka ‘Facebook’ ha ka kyrteng jong u bad lyngba ki kot khubor”.
Ka ïing Bishar ka pynpaw ba ka jingpeitngor bha ïa ka rynsan social media kata ka Facebook ba la pyndonkam ha ka kyrteng jong u nongmudui, la shem ba la pynphriang paidbah, ïa kaba u nongmudui u pynpaw ba ka long ka jingai ding, pynbitar bad kaba lah ban pynthut ïa ka suk ka saiñ u paidbah bad hapdeng ki jaidbynriew bapher bapher.
Lai tylli ki ejahar la mudui halor kajuh ka jingthoh kaba kynthup ka P.S. Case No.19/2026 ha Araimile Police Station myn ha ka 10 tarik Lber 2026 hapoh ka kyndon 196(a)(b)/351(2) jong ka BNS, 2023, bud sa ka ujor da u riewshimet hapoh ka P.S. Case No.07/2026 ha Songsak Police Station myn ha ka 12 Lber 2026, hapoh ka kyndon 196(1)/197(1)/352/353 (1)(b)(c)(2) jong ka BNS, 2023, bad ka ejahar na u Organizing Secretary ka A’chik State Peoples’ Front bad P.S. Case No.32/2026 ha Tura Police Station myn ha ka 15 tarik Lber, 2026, hapoh ka kyndon 192/196(1)/353(1)(2)/57 jong ka BNS, 2023, pule lang bad ka kyndon 6A/8B jong ka MMPO Act bad kyndon 8A/11 jong ka MMPO (Autonomous District) Act, bala pynshong nongrim kat kum ka ujor na u Heh Pulit.
U Senior Advocate K Paul, uba mihkhmat ïa u Rahman, ula pyntip ba “lai tylli ki case la register pyrshah ïa u nongmudui ka la mih na kajuh ka jingthoh ha Facebook”.
Ula pynshong nongrim na ka mukotduma TT Antony v. State of Kerala (2001), bad ka Amish Devgan v. Union of India (2021), haba ïasaid ba baroh lai tylli ki ejahar dei ban hap kynthup ne klop lang hajuh namar kam lah long ban don la ka jong ka jingtohkit halor kajuh ka daw”.
Halor kane, ka Chief Justice kala hukum ba ïa kine ki lai tylli ki ejahar dei ban kynthup lang hajuh bad ki ejahar ba la register ha Tura Police Station bad Songsak Police Station ( ba la pynkynriah noh sha ka Crime Branch Police Station (CBPS), Western Range Tura), yn pynkynriah noh sha Araimile Police Station, kaba la ïoh pdiang ïa ka ejahar ba nyngkong pyrshah ïa une u nongmudui.