Lada ïa ka MMDR Act ym lah ban pyllait ïa ka ri lum Jaintia pyntip ka JNC sha ka Commission

Shillong, Ïaïong 24: Ki nongialam ba ha khmat eh jong ka Jaiñtia National Council (JNC) Central Executive Committee (CEC) mynta ka sngi kila wan mih ha khmat u Retired Justice RS Chauhan uba dei u Chairman ka Commission of Inquiry halor ka jingeh ïa ka Ri lum Jaiñtia na ka jingshah khang tih dewiong.
Haba kren sha ki lad pathai khubor u Bah Sambormi Lyngdoh ha kaba nyngkongeh u la ïathuh ba ka Commission kala kylli sha ki ba balei kim pdiang ïa ka MMDR Act bad na ka liang jong ki, kila iathuh ba haduh ïa mynta hi ka eh bha ïa ki namar kim pat lah ban pdiang ïa ki kyndon MMDR Act, namar ba kam iahap eiei ruh em bad ka rukom long rukom man jong ka khyndew bad ka rukom bat khyndew bat shyiap hapoh Jaiñtia.
U Bah Sambormi u la iathuh ba katkum kane ka MMDR Act ne kata ka open cast mining balei kim lah ban pdiang, namar ban hap khlong shwa ïa ka khyndew kaba heh haduh 100 Hektar, hadien kata yn ioh tih ïa u dewiong uba rit, kan wanrah ka jingeh kaba khraw ïa ka mariang bad kan sa kylla duriaw ruh na ka khyndew kaba heh.
Kaba ar ngi lah phah ruh ka jingai jingmut sha ka commission ba dei ban pyllait noh ïa Jaintia na ka MMDR Act, namar lada ym pyllait na ka ngin nym lah ban bteng ïa ka kam tih dewiong hapoh Jaiñtia, u la ong.
Shuh shuh u la iathuh ba ka commission kala kylli ruh halor ki lad ki lynti ki ba lah ban plie lad ha ka kam ka jam, ka seng ka la pynpaw ha khmat ka commission ba kawei naki lad kaba ka seng kala buh hapoh ka “Save Jaiñtia Mission” kata ba ka sorkar ka dei ban wanrah ïa ka polisi h aki tnad private sector, khamtam sha ki kharkhana cement plants dakaba ai kam ïa ki trai ri, hynrei kaba sngewsih pat ba ha kine ki kharkhana phraphew percent ki dei ki nabar bad tang 15 percent kiba dei ki trai ri, kata ruh tip ioh ne ym ioh, te lada ka sorkar ka lah ban wanrah ïa kum kine ki poilisi kan sa plie lad ïaka iohkam iohjam hapoh ki district.
“Ngi lah ai jingmut ruh ïa ka commission ba ka sorkar kadei ban wanrah ïa ki institute, ki skill development, ki ban ai jinghikai ïa ki khynnah samla ba kumno ban ioh kam ioh jam ha kine ki khaekhana” ong u Bah Sambormi.
Shuh shuh u Bah Sambormi u la ong ba ki la ïakren ruh ba kumno ban kyntiew ïa ka kam rep kam riang, namar mynta hi ki don tang kine ki cement factory bad ki coke factory kiba pynjakhlia ïa ka mariang kiba pynjot ruh ïa ka mariang.
Nalor kane, u Sohniamtra u mih bha ha East Jaintia te la donkam ban don noh ki kynja kharkhana shna umsoh kum jong u soh niamtra uba lah pynmih bun hapoh Jaiñtia, na ka bynta ban shna umsoh khnang ba une u mar rep jong ngi un iaid, ong u Bah Sambormi
Na ka liang jong ka Commission kala bthah ïa ka JNC ba kan ai da ka jingthoh ha kaba ïadei bad kine ki jingai jingmut kiba la pynsngew ha khmat jong u Chairman.
Ïa kane ka kynhun la lam khmat da u bah Sambormi Lyngdoh uba dei u President, u General Secretary u bah Wanshwa Suting bad u bah Mebanteilang Sukhlain uba dei u Information Secretary ka CEC.