Ba khlem burom ki nongtrei ka Jowai Post Office ïa ki paidbah, kynduh ka JSU ïa ka Chief Postmaster

Jowai, Ïaïong 17: Ka Jaiñtia Students’ Union (JSU) Jowai Circle, haka jinglam khmat u President samla Born Rupon, u General Secretary samla Rio Pyrtuh lem bad ki dkhot kila leit ban ïakynduh ïa ka Chief Postmaster jong ka Jowai Post Office halor ki jingujor bala ïoh pdiang na ki paidbah halor ka jingleh heh bad ka jingkren khlem burom ki staff ïa ki paidbah kiba phah ne shim ïa ki parcel jong ki na katei ka ophis.
Ha ka jingïakren bad ka Chief Postmaster (CP) ka seng kala ïoh ban pynsngew ïa ka jinglong ki staff kiba la pynkheiñ ïa ka Post Office Act, 2023 bad ka Post Office Rules, 2024, kumta la dawa ba kitei ki staff ki dei ban pyni ïa ka burom bad ban sumar bha ïa ki parcel jong ki paidbah khlem jingwit eiei.
Na ka liang ka Chief Postmaster kala pdiang ïa kane ka jingujor bad kala monjur bad shimkhia ban pynbeit mardor ïa kane ka jinglong jingman jong ka rukom treikam ka office. Ka la kular ruh ban pyni pynkdew ïa ka rukom treikam sha ki staff halor ki kyndon jong ki tiar ki tar kiba la khang ïa paidbah, da kaba yn kren shai ym tang ha ka ktien Hindi ne English hynrei yn kren lang da ka ktien Khasi ne ktien Pnar namar kiba bun ki paidbah na ki thaiñ nongkyndong kim shem jingeh ban sngewthuh ïa ka ktien Hindi ne English bad kan pynsuk ïa baroh lang.
Hadien ka jingïakren ka Jaiñtia Students’ Union Jowai Circle kala pynpaw ba ka jingïalang jong ki kala long kaba seisoh, kum ka seng kan bteng ban ai ka jingshakri na ka bynta ka bha ka bha ka miat ha ka imlang ka sahlang bad pynïoh ïa ka hok jong ki paidbah. Shuh shuh ka seng kala kren shai lada kam don kano kano ka jingpynbeit kaba biang naka liang ka seng kan sa shim da kiwei pat ki lad ki lynti.