Lyngngoh ki MDC VPP ba kwah tei ïingbasa (5 Star) ka sorkar jylla ha dewlynnong Lumpongdeng

Shillong, Ïaïong 14: Ki MDC ka Voice of the People’s Party ba na Khasi Hills Autonomous District Council bad Jaiñtia Hills Autonomous District Council kiba la wan ban ai jingkyrshan bad ai mynsiem ïa ka jingïakhih u Chairman ka Green-Tech Foundation mynta la 6 Sngi ki la pynpaw ka jinglyngngoh ïa ka jingkwah ka Sorkar ban pynïeng ïa ki 5 star hotel ha Lumpongdeng.
Kitei ki MDC kiba dei na Khasi Hills District ki kynthup ïa u Bah Powell Sohkhlet, ka Kong Aibandaplin L Nonglait, u Bah Seiborlang Warbah, u Bah Eddieson Kharumnuid nalor kiwei.
Haba kren sha ki nongthoh khubor u Bah Powell u la pynpaw ba ka jingïakhih ka GTF ka dei kaba don shisha ka jingthmu ban pynneh pynsah ïa ka mei mariang bad ki sawdong sawkun.
Halor ka jingthmu ka sorkar ban pynïeng ïa ka Resorts ha u Dewlynong Lumpongdeng u Bah Powell u la ong ba ki jingpynshai jong ka Sorkar ki long tang ban pynbeij paidbah bad marpyrshah ïa ka jingdawa jong ka Green-Tech Foundation.
U la pynpaw ka jinglyngngoh halor ka jingkwah ka sorkar ban tei ïa ki 5 star hotel ha kylleng ki jaka ka bad khamtam ha u Dewlynnong Lumpongdeng u ba don hapdeng ka wah Umïam ba dei ruh ka jaka shong ki sim ki doh bad jingthaw ba im.
U Bah Powell Sohkhlet uba dei ruh u EM ka KHADC uba khmih ïa ka tnat Development bad kiwei kiwei u la pynpaw ruh ba ka jingïakhih jong ka Green Tech ka long kaba shong nongrim namar kane ka seng kaba trei mon sngewbha ka la trei shisha ïa ki kam kiba ïada ïa ka mariang.
“Hapoh wah Nanbah kaba don ha thaiñ West Khasi Hills, Nongstoiñ kane ka seng, lyngba ki dkhot ka la hiar ban pynkhuid ïa kane ka wah bad ki don ruh kiwei pat ki kam kiba bun kiba kane ka seng ka la leh ban pynneh bad tyngkai ïa ka mariang, kumta ym dei satia ban artatien ïa ki jingdawa jong ka,” bynrap u Bah Powell.
U la ong ruh ba ka jingthmu jong ka sorkar ban shna ïa ki hotel ha katei ka Dewlynnong kam ai jingmyntoi ïa kiba bun hynrei tang ïa ki katto katne. U la ong ruh ba ka jingpynshai jong u Myntri Rangbah halor kane ka projek kam long kaba biang naba ka ïa long mar khongpong bad ki jingdawa jong ka seng.
“Haba peit ïa ka RTI kaba ka seng ka la ïoh ka pyni shai ba ka sorkar ka don ka jingthmu ban tei ïa kine ki hotel bad kiwei bad kumta ka long kaba ïapher bak ly bak jong ka jingpynshai jong u Myntri Rangbah ka jylla, kumta ka VPP kan ïai pyrshah beit ïa kane ka jingthmu bad lada ka sorkar kam weng ne pyndam ïa kane ka projek kan sa shim da ki rai jingïakhih kiba tyngeh halor kane ka phang,” bynrap shuh shuh u MDC ka VPP.
Haba ïadei bad ka jingdonkam jong ka Council ban tuklar ha kane ka jaka, u Bah Powell u la ong ba kane ka jaka kam hap hapoh ka jingkhmih jong ka KHADC bad jin ba ka la hab hapoh ka KHADC dalei lei ruh yn ym ai satia ïa ka NOC.