Shillong, Ïaiong 14: Ka KSU Laban Circle mynta ka sngi ka 14 tarik u Ïaiong ka la leit ban khang ïa kawei ka jaka leh niam ha Lower Lumparing kaba dei jong ki Muslim da kaba ki la kynnoh ba ki Muslim ki la pynkylla masjid beaiñ bad ai kyrteng ïa kane ka jaka kum ka Lumparing Masjid.
Kat kum ka KSU, Ka seng hadien ba ka la wad bniah halor ka jinglong trai jong kane ka jaka, ka la lap ba kane ka jaka kam shim dei jong no jong no ruh bad ki riew ngeit muslim ki lah shna Majid beaiñ ha kane ka jaka khlem ioh jingbit na ka shnong ne na ki bor ba dei peit.
Kane kala la pynlong ïa ka Seng ban khang noh ïa kane ka jaka lehniam ba beaiñ jong ki muslim bad ban beh ruh ïa u imam uba sah beaiñ bad uba ai jing hikai shaphang ka niam islam ha kane ka jaka.
Ha ki por ba rim ka la ai jaka ban shna iing na bynta u chowkidar uba peit ïa ka lumjingtep muslim, hynrei mynta pat kane ka jaka ka kylla long kum ka masjid kaba long beaiñ.
Na ka liang jong ka Dorbar Shnong Lower Lumparing ruh hadien ba ka la ioh jingujor na ka Seng ka la jurip bad ka la rai ban pynduh noh ïa kane ka masjid hynrei na ka liang jong kine ki muslim kim shym la lah ban leh eiei halor kane ka bynta.
Ka Seng ha kine ki sngi kan sa buh jingujor ha khmat ki bor pyniaid ban weng syndon ïa kane ka jaka.
