Sha u SDO ujor ki 11 Seng Bhalang ba shah ujor FIR ki nongïalam khlem ki nongrim hadien ka jingkulmar pher jaidbynriew

Shillong, Iaiong 14 : Khatwei tylli ki kynhun Sengbhalang ha Dadenggre, ki la ai ka jingujor sha u Sub-Divisional Officer (Civil), da kaba kynnoh thombor ïa ki Nongïalam jong ki bad ka jingbym ïaid kat kum ka lynti ba dei, da ki bor Pulit hadien ka jingkulmar kaba mih na ka jingïakynad pher Jaidbynriew ba dang shen ha ri-lum Garo.
Ha ka shithi ujor ba 14 tarik Iaiong, ki Nongïalam Sengbhalang ba kynthup ïa ka Garo Students’ Union (GSU), FKJGP, AAYF, A’chik Youth Welfare Organisation, ACHIK, ADE, FAF, AHAM, HANM bad kiwei kiwei ki la pynpaw ka jingsngewkhia halor ka jingujor ejahar pyrshah ïa ki Nongïalam Sengbhalang khlem ki sakhi sabut kiba thikna.
“La ïoh jingtip ba ki Nongïalam Sengbhalang ki la shah jer kyrteng ha ka ejahar ha kaba ïadei bad ka jingshah pynjulor ki nongkynti paidbah kum ki dukan, ki ïing, ki kali ” ong ka shithi ujor.
Ki la kdew ïa ka case kaba ki nongialam sengbhalang kiba shah khot hajir ha Dadenggre Police Station myn ha ka 11 tarik Iaiong haba pynshong nongrim ïa ka ejahar ba la rejister hapoh ki kyndon ka BNS bad ka MMPO.
“Ka jingkhot hajir bad ki jingkynnoh ki paw kum kiba pynshong nongrim na ki jingkren mano re mano ha ka jaka jong ki sakhi satar, lane ki jingïathuh ki nongsakhi” ong ka shithi ujor.
Ki la kynnoh ruh ba kine ki nongïalam ba shah khot hajir ki la hap ban leit leh ïa ka medical examination watla kim pat shym la shah kem ruh.
“Kat kum ki kyndon treikam, ïa ka medical exam la ju leh hadien bala kem ïa ki briew” Ki la kynnoh ba kane ka jingleh ka dei tang ka jingpynjah burom ïa ki Nongïalam bad ban pynlehraiñ ïa ki hakhmat ki briew. Kumta ki pynrem jur ïa kane ka jingleh ki bor synshar district bad bor pulit.
Ki la kynnoh shuh shuh ba ka dei ka j jingpynkheiñ ïa ka hok long briew man briew bad ka jingleh ban shu jied briew haba ujor ïa ka ejahar bad khot hajir ïa ki nongïalam, ka dei tang ka jingpyntieng pynsmiej ïa ki Nongïalam bad kiba kum kine ki jingleh ki la pynduh noh ka jingshaniah ki paidbah ha ki bor synshar district.
Ki la bynrap “Hato kane ka dei ka bainong ba ki bor synshar district ki siew kylliang ïa ka jingshakri jong ki kynhun sengbhalang ha Dadenggre” haba ban jur ïa ka bynta jong ki sengbhalang ban pynneh ïa ka jingshongsuk ha ka thaiñ.
Ka Dadenggre ka long kawei na ki jaka ba duna ki jingkulmar bad ba duna ki case ba la rejister da ki pulit, Ki 11 seng bhalang ki la byrngem ba kin ym phai dien ne kynran dien ban ong ba ki dei ki seng bhalang kiba wanrah bad pynneh ïa ka shongsuk shongsaiñ ha Dadenggre.
Kumta ki Seng bhalang ki la buh saw tylli ki mat jingdawa hakhmat ki bor synshar district ban bishar bniah biang ïa ki Ejahar ne FIR ba la ujor pyrshah ïa ki Nongialam, ban sangeh mardor ïa ki jingthombor bad phah leit eksamin ha ki doktor khlem pat kem, ban ïakren bad ki bor synshar jongka Sub Division ban pynneh pynsah ïa ka jingshong suk bad ban pynshitom ïa kito ki briew jongka aiñ kiba pyndonkam bakla ïa ka bor jongki.
Sa shisien ki seng bhalang ki buh ka jingshaniah ha ki bor synshar bad dawa ban thaw ki lad ki lynti ban pynneh pynsah ïa ka shongsuk shongsaiñ.