Shen yn pynbna kyrtong ka NPP ban ïakhun ïa ka MP elekshon shiteng samoi sha Lok Sabha

Shillong, Iaiong 14: Ka National People’s Party (NPP) shen kan sa pynbna ia u ne ka kyrtong na ka bynta ka election shiteng samoi jong ka MP Lok Sabha na Shillong Constituency.
“Na ka liang jong ka seng, ngi lah rai ban pynïeng kyrtong na ka bynta ka election shiteng samoi jong ka MP Lok Sabha na Shillong Constituency” ong u President ka NPP Meghalaya bad Symbud Myntri Rangbah ka jylla Bah Prestone Tynsong hynne ka sngi baar.
Haba kylli mano ban dei u ne ka kyrtong jong ka seng NPP, u Bah Tynsong ula ong, “Ngin sa pyntip ïa phi”.
Ula bynrap ba ka seng ka don ïa bun ngut ki kyrtong kiba biang kiba kan pdiang hynrei ïa ka rai kaba khatduh yn sa shim da ka election committee.
Ha kaba ïadei bad ka jingjied ïa u kyrtong na ka bynta ka Rajya Sabha, u Bah Tynsong ula ong, ba ka seng kam pat ïoh pdiang ïa kano kano ka jingtyrwa bad ki dang ap ba ka Election Commission bad ka ophis treikam jong u Speaker ne Chairman ka Rajya Sabha ban pynmih ïa ka jingpynbna paidbah.
“Ngi ngim pat ïoh pdiang ïa kano kano ka jingtyrwa na ki kyrtong, kumta ngam pat lah ban ong eiei mynta. Ai ba ka jingpynbna paidbah kan mih shwa na ka Election Commission ryngkat bad na ka ophis jong u Speaker ne Chairman ka Rajya Sabha,” ula ong.